१५ चैत, काठमाडौं । अखिल नेपाल फुटबल संघ (एन्फा)ले श्रीराम दवाडीको संयोजकत्वमा निर्वाचन समिति गठन गरेको छ । समितिमा अधिवक्ता रामचन्द्र गौतम सह-संयोजक, दामोदर भट्टराई सदस्य, अधिवक्ता सरस्वती श्रेष्ठ वैकल्पिक सदस्य र अधिवक्ता प्रिती कार्की बैकल्पिक सदस्य रहेका छन् ।
ललितपुरमा मंगलबार भएको साधारण सभाले आगामी एन्फा निर्वाचनका लागि समिति गठन गरेको हो ।
यस्तै साधारण सभाले खेलाडी संघका अध्यक्ष राजेश मानन्धर, महिला संघको अध्यक्ष वृन्दा देवान र संखुवासभा जिल्ला फुटबल संघका प्रतिनिधि गौरीमान राईको नाम निरीक्षकमा पारित गरेको छ ।
बैठकको निर्णय पुस्तिका प्रमाणित गर्न सानेपा क्लबका अध्यक्ष ध्रुव विक्रम पाण्डे, नुवाकोट जिल्ला फुटबल संघका अध्यक्ष दिपक चित्रकार र रेफ्री संघका अध्यक्ष बुद्धि बहादुर गुरुङ्गलाई जिम्मेवारी दिइएको छ ।
विष्णु लुइटेल संयोजक, सुधा रिजाल सहसंयोजक, केशरमणि अर्याल सदस्य, यज्ञ बहादुर राना वैकल्पिक सदस्य र हरिप्रसाद इग्नाम बैकल्पिक सदस्य रहने गरि निर्वाचन पुनरावेदन समिति गठन गरिएको एन्फाले जनाएको छ ।
एन्फा निर्वाचनमा अध्यक्षका उम्मेद्वारले १५ हजार, वरिष्ठ उपाध्यक्ष र उपाध्यक्षले १० हजार र सदस्यका उम्मेद्वारले ५ हजार रुपैयाँ मनोनयन शुल्क तिर्ने निर्णय पनि साधारण सभाबाट पारित भएको छ । एन्फाको निर्वाचन यसअघि नै २०७९ जेठ १५ गतेलाई तोकिएको छ । त्यसैगरी जिल्ला फुटबल संघको निर्वाचन २०७९ वैशाख १ देखि १० गतेसम्म हुने छ ।
प्रतिक्रिया 4