गाई चिह्न नपाउँदा कमल थापाको आक्राेश, ट्विटरमा चेतावनी

२१ भदौ, काठमाडौं। राप्रपा नेपालका अध्यक्ष कमल थापाले सर्वोच्च अदालतले गाई चुनाव चिह्‍न नदिएर आफ्‍नै दुई अन्तरिम आदेश उल्टाउने काम गरेको टिप्पणी गरेका छन् ।

बुधबार सर्वोच्च अदालतले दर्ता गरेको रिट निवेदन खारेज हुने आदेश दिएपछि थापाले ट्विटरमार्फत यस्तो टिप्पण गरेका हुन् ।

उनले ट्विटरमा भनेका छन्, ‘कुन कानुनमा टेकेर सर्वोच्च अदालतको आफ्नै दुई अन्तरिम आदेश उल्टाउने काम मा.कुमार रेग्मी र मा.तिलप्रसादको ईजलासले गर्‍यो, यसको जवाफ उहाँहरुले दिनुपर्नेछ।’

यस्तै उनले सर्वोच्चको फैसला माने पनि हतोत्साहित र विचलित नहुने बताए । उनले भ्रष्ट प्रवृत्ति र शक्तिका पुजारीहरुको भण्डाफोर गर्नेसमेत चेतावनी दिए। उनले भने, ‘…तर, हामी हतोत्साहित वा विचलित भएका छैनौ। अदालत, संवैधानिक अंग र राज्यव्यवस्थामा रहेका यस्ता विकृतिका पर्खालहरु भत्काएर अझ उच्च मनोबल, दृढता र सक्रियताका साथ अघि बढ्ने छौँ।भ्रष्ट प्रवृत्ति र शक्तिका पुजारीहरुको भण्डाफोर गर्नेछौँ।’