कुशल मल्ल पाकिस्तान जुनियर लिग क्रिकेटमा अनुबन्ध

२३ भदौ, काठमाडौं ।  युवा अलराउण्डर कुशल मल्ल पाकिस्तान जुनियर लिग क्रिकेटमा अनुबन्ध भएका छन् । उनलाई ग्बादर शार्कले अनुबन्ध गरेको हो ।

१९ वर्षमुनिका खेलाडी सहभागी हुने पाकिस्तान जुनियर लिग क्रिकेटमा छ टिमले प्रतिस्पर्धा गर्ने छन् । यी टिमले ६६ जना पाकिस्तानीसहित २४ विदेशी खेलाडीलाई अनुबन्ध गरेका छन् । ती २४ मध्येमा कुशल पनि एक हुन् ।

मल्लले यसअघि युएईमा भएको टी-१० लिगमा सहभागिता जनाएका थिए ।

१८ वर्षका उनी एक दिवसीय क्रिकेट र टी-२० अन्तर्राष्ट्रियमा अर्धशतक प्रहार गर्ने सबैभन्दा कान्छा खेलाडी हुन् ।

२०७६ माघमा त्रिवि क्रिकेट मैदान कीर्तिपुरमा उनले १५ वर्ष ३४० दिनको उमेरमा अमेरिकाविरुद्ध ४९ बलमा अर्धशतक बनाएका थिए । यस्तै गत वैशाखमा अमेरिकासँगको टी-२० अन्तर्राष्ट्रियमा अर्धशतक प्रहार गरेर उनले अर्को कीर्तिमान बनाएका थिए ।