+
+

लाल मोहम्मद हत्यामा अन्डरवर्ल्ड डन छोटा राजन समूह जोडियो

भारतविरुद्ध गतिविधि गरेको आरोपमा जति पनि नेपाली मारिएका छन्, उनीहरुको हत्यामा छोटा राजन वा बब्बु श्रीवास्तवको समूह प्रयोग हुने गरेको इतिहास छ । उनीहरुलाई भारतीय खुफिया निकायले प्रयोग गर्ने गरेको विगतमा गठन भएका छानबिन समितिका प्रतिवेदनहरुले बताउँछन्, मोहम्मद हत्यापनि यसैको सेरोफेरोमा भएको सुरक्षा अधिकृतहरू बताउँछन् ।

गौरव पोखरेल गौरव पोखरेल
२०७९ असोज ५ गते २०:२०

५ असोज, काठमाडौं । सोमबार साँझ गोठाटारमा भएको लाल मोहम्मद हत्यामा अन्डरवर्ल्ड डन छोटा राजन समूहको कनेक्सन भेटिएको छ ।

हत्याको अनुसन्धानका लागि प्रहरी वरिष्ठ उपरीक्षक (एसएसपी) जनकराज भट्टराई नेतृत्वमा गठित अनुसन्धान समितिले मोहम्मदको हत्यामा भारतको दिल्ली घर भइ नेपाल बस्दै आएका नितिन मदनको संलग्नता भेट्टाएकोे छ ।

नितिन मदन तिनै व्यक्ति हुन्, जसको छोटा राजन समूहका एक मुख्य सहयोगी उदय सेट्ठीसँग सम्बन्ध छ । नितिन मदनको अपहरण आरोपमा हाल रसुवा कारागारमा रहेका अन्डरवर्ल्ड डन सेट्ठीसँग नियमित टेलिफोन सम्पर्क हुने गरेको पाइएको छ ।

विगतमा नेपालमा मारिएका कमलसिंह नेपाली, सांसद मिर्जा दिलसाद बेग, अब्दुल मजित मनिहार र कारागारमा भएको युनुस अन्सारीको हत्या प्रयासमा पनि छोटा राजन समूहको संलग्नता खुलेको थियो ।

भारतविरुद्ध गतिविधि गरेको आरोपमा जति पनि नेपाली मारिएका छन्, उनीहरुको हत्यामा छोटा राजन वा बब्बु श्रीवास्तवको समूह प्रयोग हुने गरेको इतिहास छ ।

कारागारमा युनुस अन्सारीलाई मनमित सिंहले गोली हान्दा नेपाल प्रहरीका एक अधिकृतलाई छोटा राजन बताउने व्यक्तिले फोन गरेर आफूले मार्न लगाएको बताएका थिए । जमिम शाहको हत्यामा बब्लु श्रीवास्तवको समूहको संलग्नता देखिएको थियो ।

छोटा राजन र बब्लुलाई भारतीय खुफिया एजेन्सीले प्रयोग गर्ने गरेको विभिन्न समयमा गठित छानविन समितिका प्रतिवेदनहरुको निष्कर्ष छ । लाल मोहम्मद हत्यामा पनि त्यही दोहोरिएको देखिएको अनुसन्धान अधिकृतहरु बताउँछन् ।

खुल्यो नजिकै होटलमा बस्ने आरोपी पहिचान

मोहम्मद मारिनु तीन दिन अघिबाट नितिन मदन घटनास्थलबाट ३ सय मिटर अगाडि रहेको कोशीपारि गेष्ट हाउस एण्ड होटलमा बसिरहेको पाइएको छ ।

होटलका कर्मचारीले अनलाइनखबरलाई बताएअनुसार रजिष्टरमा उनले जितेन खानका रुपमा आफ्नो परिचय खुलाएका छन् ।

‘जितनको नामबाट त्यहाँ बसेको व्यक्ति नै नितिन मदन भएको खुलेको छ,’ अनुसन्धानमा संलग्न एक अधिकृत भन्छन्, ‘उनले नै हतियार व्यवस्थापनदेखि सुटरसम्म ल्याउने काम गरेको देखिएको छ ।’

जिल्ला प्रहरी परिसर, काठमाडौंले होटल कोशीपारि गेष्ट हाउसको क्लोज सर्किट (सीसी) टीभी फुटेज पनि संकलन गरेको छ, जसमा मोहम्मदलाई भेट्न आउने व्यक्तिहरु पनि देखिएका छन् । तिनैमध्येका दुईजना सुटर हुनसक्ने प्रहरीले आशंका गरेको छ ।

उनीहरुले प्रयोग गरेको एउटा मोटरसाइकल पनि प्रहरीले बरामद गरेको छ । यद्यपि, त्यो मोटरसाइकल मोहम्मद हत्याका क्रममा प्रयोग भएको थिएन ।

सेट्ठी र नितिन मदनको नियमित सम्पर्क

अन्डरवर्ल्ड डन सेट्ठी भारतमा मोस्ट वान्टेड भएपछि नेपाल छिरेका अपराधी हुन् । उनको अन्डरवर्ल्ड डन छोटा राजन समूहसँग निकट सम्बन्ध छ ।

कुनैबेला मुम्बईमा रहेर त्यहाँका कारागारहरुमा खाना पुर्‍याउने काम गर्ने  सन्तोष  सेट्ठीमार्फत उनले छोटा राजन समूहसँग सम्बन्ध बनाएको स्रोतको भनाइ छ ।

सन्तोषले त्यसबेला मुम्बईको चर्चित फजल अल रहमान समूहसँग पनि काम गरेका थिए । सन्तोषमार्फत नै उदय छोटा राजन समूहसँग नजिकिएका थिए ।

भारतमा इन्काउन्टरमा पर्ने जोखिम बढेपछि उनी २०५९ सालमा नेपाल प्रवेश गरेको विशेष ब्यूरोको एक रिपोर्टले देखाउँछ । नेपाल छिरेपछि उनी ‘किडन्यापिङ किङ’ अमर टण्डनसँग जोडिएका थिए । त्यसपछि उनले टण्डनसँग मिलेर नेपालमा अपहरणको श्रृंखला चलाएका थिए । २०६४ सालको फागुनमा टण्डन पक्राउ परेपछि सेठ्टीले अपहरणको गिरोह चलाएका थिए ।

टण्डन पक्राउ परेपछि सेठ्टीले आफ्नो समूह बनाएर पहिलो पटक सामाखुशीका व्यवसायी केदार कक्षपतीका छोरा निरजलाई अपहरण गरेर एक करोड ५० लाख रुपैयाँ फिरौती असूलेका थिए ।

पछि २०६६ साल पुसको अन्तिमतिर तत्कालीन महानगरीय अपराध अनुसन्धान महाशाखाको टोलीले अर्जन भन्ने उदय सेट्ठी, प्रह्लाद महत, विष्णु जिसी, टासी गुरुङ र विकास कार्की गरी ५ जनालाई पक्राउ गरेको थियो ।

मुम्बईमा रहेर त्यहाँका कारागारहरुमा खाना पुर्‍याउने काम गर्ने गर्दागर्दै सेट्ठीले अन्डरवर्ल्डका सदस्यहरुसँग सम्बन्ध बनाएका थिए । मुम्बईमा इन्काउन्टरमा मारिने डर भएपछि उनी नेपाल आएर अपहरणको धन्दामा संलग्न भएका थिए ।

अनुसन्धानमा संलग्न एक अधिकृतले बताए अनुसार रसुवा कारागारमा रहेका अन्डरवर्ल्ड डन उदय सेट्ठीले जेलमै बसेर पनि आफ्नो गतिविधि सञ्चालन गरिरहेको पाइएको छ । त्यसका लागि उनले नितिन मदनलाई पनि प्रयोग गर्ने गरेको पाइएको छ ।

स्रोतको दाबीअनुसार नितिन मदनले पटकपटक रसुवा कारागारमा गएर पनि सेट्ठीलाई भेटेको पाइएको छ । सेट्टीले पनि रसुवा कारागारबाट पटकपटक फोन गरेको देखिन्छ ।

स्रोतका अनुसार एक वर्षअघि न्यूरोडमा हुण्डी कारोबारको ७० लाख नेपाली रुपैयाँ र ३० लाख भारतीय रुपैयाँ लुटिएको थियो । त्यसपनि मदनको समूह जोडिएको आशंका गरिएको छ ।

पछिल्लो समय भने नितिन मदन, लाल मोहम्मदसँग नजिकिएका थिए । उनै नितिन मदनको योजनामा लाल मोहम्मद मारिएको हुनसक्ने प्रहरीको प्रारम्भीक अनुमान छ ।

श्रृंखलाबद्ध हत्यामा छोटा राजन कनेक्सन

नेपालमा रहेर भारतविरुद्ध गतिविधि गरेको अभियोगमा २०५५ सालपछि हालसम्म १० जना नेपालीको श्रृंखलाबद्ध हत्या भएको छ । अधिकांश हत्यामा पेशेवर अपराधी प्रयोग भएका छन् ।

तर यसको अन्तर्यमा भारतको रिसर्च एण्ड एनालाइसिस विङ (रअ) र क्राइम ब्रान्चको एन्टी एक्स्टर्सन सेल (एईसी) बाट उनीहरुलाई परिचालन गरेको देखिन्छ । आतंकवाद र अन्तरदेशीय अपराध हेर्ने नेपाल प्रहरीको विशिष्टकृत इकाइ विशेष ब्यूरोका एकजना पूर्वप्रमुखका भनाइमा भारतका खुफिया निकायले पेशवर अपराधीको प्रयोग गरेर नेपालमा विभिन्न व्यक्तिको हत्या गर्ने गरेका छन् ।

नेपालमा भारतीय पक्षका संलग्नता देखिने गरी भएका व्यक्ति हत्यामा मुख्य गरी भारतीय अन्डरवर्ल्ड डन छोटा राजन र बब्लु श्रीवास्तवका समूहका समस्य मुख्य डिजाइरका रुपमा देखिने गरेका छन् ।

अन्डरवर्ल्ड डन छोटा राजन ।

नेपालमा मारिने व्यक्तिविरुद्ध जाली भारतीय रुपैयाँको कारोबार, पाकिस्तानमा बस्ने अन्डरवर्ल्ड डन डाउद इब्राहिमको डि–कम्पनीको एजेन्ट र भारतले आतंकवादी भनेका व्यक्तिलाई सेल्टर दिएको आरोप लाग्ने गर्छ ।

कुनै बेला छोटा राजन दाउदकै समूह रहेर काम गर्थे, मुम्बईमा मोस्ट वान्टेड भएपछि दाउद भागेर दुबई गएका थिए । दाउद दुबई गएपछि छोटा राजन दाउदका दाहिने हात भएर काम गर्थे ।

तर छोटो समयमै मुम्बईमा उनले प्रभाव बढाए । दाउदभन्दा बलियो हुँदै गए । छोटा राजनको मुम्बईमा प्रभाव पढ्दै गएपछि उनले दाउदले छोटा राजन निकट खिमबहादुर थापाको हत्या गराएका थिए ।

सुरुमा उनले दाउदलाई त्यति शंका गरेनन्, पछि उनका अन्य निकटवर्ती पनि मारिन थालेपछि दुईबीच दुस्मनी बढ्दै गएको थियो । छोटो राजनलाई पनि मुम्बईमा एकलौटी राज गर्नु थियो ।

दुईबीच द्वन्द्व उत्कर्षमा पुगेको चाहिँ मुम्बई १२ मार्च १९९३ मा भएको विष्फोटपछि हो । घटनापछि मुम्बईमा हिन्दु–मुस्लिम विवाद चर्किएको थियो । त्यसक्रममा कट्टर हिन्दु राजन र दाउद स्पष्टरुपमा छुट्टिएका थिए ।

त्यसयता दाउदविरुद्ध भारतीय प्रहरीले छोटा राजनको समूहलाई पनि प्रयोग गर्न थालेको थियो । त्यही श्रृंखला स्वरुप जाली नोटको कारोबार गर्ने भनिएका लाल मोहम्मद काठमाडौंमा छोटा राजनको सहयोगमार्फत मारिएको हुनसक्ने सुरक्षा निकायको आशंका छ ।

लेखकको बारेमा
गौरव पोखरेल

पोखरेल अनलाइनखबरका लागि सुरक्षा, अपराध तथा समसामयिक विषयमा रिपोर्टिङ गर्छन् ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?