पब्जी विश्व च्याम्पियनसिप फाइनल आजदेखि, नेपालका दुई टिम खेल्दै

२२ पुस, काठमाडौं । इस्पोर्टस्को मुख्य बिधा पब्जी मोबाइल विश्व च्याम्पियनसिपको फाइनल चरणका खेलहरु शुक्रबारदेखि सुरु हुँदैछन् । विभिन्न चरण पार गरी फाइनलमा छनोट भएका १६ टिमबीचको प्रतिस्पर्धाबाट आइतबार नयाँ विश्व विजेताको टुंगो लाग्नेछ ।

१० नोभेम्बर २०२२ देखि मलेसियाको क्वालालम्पुरमा सुरु भएको यो प्रतियोगितामा समूह चरण, सर्भाइभल चरण र लास्ट चान्समार्फत फाइनल चरणका लागि टिम छनोट गरिएको हो । इण्डोनेसियाको जकार्तामा हुने फाइनल चरणका खेलहरु नेपाली समयअनुसार शुक्रबार साँझ साढे ६ बजेदेखि सुरु हुनेछ ।

४० लाख अमेरिकी डलर कुल पुरस्कार राशी रहेको पब्जी मोबाइल विश्व च्याम्पियनसिपमा नेपालका तीनसहित ५१ टिमको सहभागिता थियो । उनीहरु आआफ्नो महादेशीय छनोट पार गरेर विश्व च्याम्पियनसिप खेल्न आएका हुन् ।

१० देखि २७ नोभेम्बरसम्म सञ्चालित समूह चरणमा ४८ टिमलाई समावेश गरिएको थियो । उनीहरुलाई तीन समूहमा विभाजन गर्दा हरेक समूहमा १६ टिम थिए । समूहमा शीर्ष ३ टिम सिधै फाइनलमा पुग्दा चौथोदेखि ११औं स्थानका टिमले सर्भाइभल चरण खेल्नुपर्ने भयो । बाँकी पाँच टिम समूहबाटै बाहिरिए ।

तीन समूहबाट ८–८ गरी २४ टिमबीच ३० नोभेम्बरदेखि २ डिसेम्बरसम्म सर्भाइभल चरणमा प्रतिस्पर्धा भयो । तीमध्ये शीर्ष १६ टिम लास्ट चान्सका लागि छनोट हुँदा पुछारका ८ टिम बाहिरिए ।

लास्ट चान्सको प्रतिस्पर्धा ३ र ४ डिसेम्बरमा आयोजित थियो । यो चरणमा १६ टिम समावेश थिए । उनीहरुमध्येबाट शीर्ष पाँच टिमलाई फाइनल चरणमा प्रवेश गराइएको हो । सबै चरणका खेल मलेसियामा आयोजित थिए ।

तीन समूहका शीर्ष तीन गरी ९ टिम, लास्ट चान्सबाट आएका ५ र सिधा फाइनलमा आमन्त्रित दुई गरी १६ टिमबीच फाइनलमा प्रतिस्पर्धा हुन लागेको हो । चीनको वुल्भ्स इस्पोर्टस र इण्डोनेसियाको अल्टर इगो लिम्याक्सलाई सिधा फाइनलमा आमन्त्रण गरिएको हो । यी दुई टिम नै उपाधिको मुख्य दावेदारसमेत हुन् ।

नेपालबाट टीटूके र डीआरएस खेल्दै

नेपाली टिमले विश्व च्याम्पियनसिप खेलेको यो तेस्रोपल्ट हो । यसअघि दुई पटक डीआरएस टिम समूह चरणमा पुगे पनि त्यसबाट माथि उक्लन सकेको थिएन । तर, यसपल्ट डीआरएससहित टीटूके र स्काइलाइट्सले समूह चरण पार गरे । टीटूकेले समूहमा शीर्ष तीनभित्र रहेर सिधै फाइनलमा स्थान बनायो । स्काइ लाइट्ज सर्भाइभल चरणबाट अघि बढ्न सकेन ।

टीटूके र डीआरएस भने फाइनल चरण खेल्दैछन् । एल्लो समूहमा परेको टीटूके समूहमा तेस्रो हुँदै सिधै फाइनल स्पर्धाका लागि छनोट भएको हो । यो पबजीमा नेपालकै सबैभन्दा ठूलो सफलतासमेत हो । समूह चरणमा तेस्रो भएपछि उसले ८० हजार अमेरिकी डलर पुरस्कार पायो भने सहभागिता खर्चका रुपमा १० हजार अमेरिकी डलरसमेत पाएको थियो ।

समूहमा छैटौं भएपछि डीआरएस सिधा फाइनल चरणमा पुग्न सकेन । तर, सर्भाइभल चरणमा सातौं हुँदै लास्ट चान्समा चौथो स्थान हासिल गरेर फाइनलमा पुग्न सफल तयो । समूहमा छैटौं भएबापत २० हजार, सर्भाइभलमा सातौं भएपछि २० हजार र लास्ट चान्समा चौथो भएपछि २२ हजार डलर गरी उसले कुल ६२ हजार डलर पुरस्कार पाइसकेको छ । सहभागिता खर्चका रुपमा १० हजार डलर पनि पाएको थियो ।

अर्को नेपाली टिम स्काइ लाइट्ज समूहमा नवौं हुँदै सर्भाइभल चरणमा पुगेको थियो । तर, सर्भाइभल चरणमा रहेका २४ मध्ये २१औं भएपछि यो टिम विश्वकपबाट बाहिरियो । समूहमा नवौं भएबापत १७ हजार र सर्भाइभलमा २१औं हुँदा ६ हजार गरी २३ हजार अमेरिकी डलर पुरस्कार पायो । सहभागिता खर्चका रुपमा उसले पनि १० हजार अमेरिकी डलर पाएको थियो ।

यो पनि पढ्नुहोस

नेपालको पब्जी टिम डीआरएस ग्लोबल च्याम्पियनसिपका लागि छनोट

फाइनल चरण खेल्ने टीटूके टिममा अभिषेक सिंह, सुयोग मुल्मी, वसन्त गौतम, सन्देश प्रधान र ऋग्देन बज्राचार्य छन् । यस्तै डीआरएस टिममा दीपेश गुरुङ, साहस भण्डारी, सुविनकुमार प्रजापति, समीर गुरुङ र संगीन भट्टराई छन् ।

शुक्रबारदेखि फाइनल चरणमा पुगेका १६ टिमबीच प्रतिस्पर्धा सुरु हुनेछ । यो चरणमा हरेक टिमले १८ खेल खेल्नेछन् । हरेक खेलमा हासिल गरेको अंकका आधारमा सर्वाधिक अंक ल्याउने टिम विश्व च्याम्पियन बन्नेछ ।

४० लाख डलर कुल पुरस्कार राशीमध्ये फाइनल चरणका लागि १५ लाख डलर छुट्याइएको छ । त्यसबाहेक फाइनल खेल्ने टिमले सहभागिता खर्चका रुपमा प्रति टिम २० हजार अमेरिकी डलर पाउनेछन् ।

विश्व च्याम्पियन टिमले ४ लाख अमेरिकी डलर पुरस्कार पाउनेछन् । पहिलोदेखि १६औं स्थानसम्मका टिमलाई नगद पुरस्कार पाउने व्यवस्था छ । उपविजेताले २ लाख, तेस्रो हुनेले १ लाख २० हजार डलर पुरस्कार पाउनेछन् । फाइनल चरणमा अन्तिम अर्थात् १६औंै हुने टिमले पनि १५ हजार अमेरिकी डलर पुरस्कार पाउँछन् ।

यो पनि पढ्नुहोस

पब्जी मोबाइल विश्वकप आजदेखि सुरु, नेपालबाट तीन टिम सहभागी

चौथो हुने टिमले ८० हजार, पाँचौं हुनेले ५० हजार, छैटौं हुनेले ५० हजार, सातौं हुनेले ४२ हजार, आठौं हुनेले ३५ हजार, नवौं हुनेले ३२ हजार ५ सय र दशौं हुनेले ३० हजार अमेरिकी डलर पुरस्कार पाउनेछन् ।

११औंदेखि १६औं स्थानका टिमले क्रमसः २७ हजार ५००, २५ हजार, २२ हजार ५००, २० हजार, १७ हजार ५०० र १५ हजार अमेरिकी डलर पुरस्कार पाउनेछन् ।

यो पनि पढ्नुहोस