१० माघ, काठमाडौं । प्रशिक्षक मेघराज केसी शहीद स्मारक ए डिभिजन लिगका लागि थ्रीस्टार क्लबमा अनुबन्ध भएका छन् ।
गत सिजन ए डिभिजनको नवप्रवेशी सातदोबाटो युथ क्लबको प्रशिक्षक बनेका केसी नयाँ सिजनका लागि थ्रीस्टारमा फर्केका हुन् ।
ललितपुरे क्लब थ्रीस्टारले मंगलबार मेघराज प्रशिक्षकको रुपमा अनुबन्ध गरेको जनाएको छ ।
यस्तै थ्रीस्टारले गोलकिपर प्रशिक्षक उज्वल मानन्धरलाई गोलकिपर प्रशिक्षकको रुपमा अनुबन्ध गरेको जनाएको छ । यसअघि मेघराज र उज्वलले दुवै थ्रीस्टारमा सँगै काम गरिसकेका छन् ।
केसीले यसअघि २०७६ को ए डिभिजन लिगमा थ्रीस्टारको प्रशिक्षक बनेर काम गरेका थिए । त्यसपछि उनी आफ्नै एकेडेमी सञ्चालन गर्ने लक्ष्यसहित क्लब फुटबलबाट टाढिएका थिए ।
तर कोभिड-१९ को महामारीपछि आफ्नो कामलाई रोक्दै उनी पहिलो संस्करणको नेपालको सुपर लिगमा एफसी चितवनको प्रशिक्षक बनेका थिए ।
गत वर्ष भएको लिगमा सातदोबाटोको प्रशिक्षक बन्दै मेघराजले सातदोबाटोलाई ए डिभिजनको डेब्यु सिजनमै चौथो बनाएका थिए ।
पीएलए स्पोर्ट्स क्लबबाट प्रशिक्षकको करिअर सुरु गरेका मेघराजले यसअघि ए डिभिजनको थ्रीस्टारसहित मछिन्द्र क्लब, हिमालयन शेर्पा क्लब, फ्रेण्ड्स क्लब र त्रिभुवन आर्मी क्लबको प्रशिक्षकको जिम्मेवारी सम्हालिसकेका छन् ।
मेघराजले पछिल्लो पटक साफ यू-२० च्याम्पियनसिपमा नेपालको पुरुष टिमको प्रशिक्षण सम्हालेका थिए ।
प्रतिक्रिया 4