कञ्चनपुरका शुक्लाफाँटा आरक्ष पीडितको समस्या समाधान गर्ने प्रतिबद्धता

८ जेठ, काठमाडौं । प्रधानमन्त्री पुष्पकमल दाहाल प्रचण्डले कञ्चनपुरका शुक्लाफाँटा आरक्ष पीडितको समस्या समाधान गर्ने प्रतिबद्धता जनाएका छन् ।

सोमबार प्रधानमन्त्री निवास बालुवाटारमा कञ्चनपुरका जनप्रतिनिधिसहित आरक्ष पीडितहरुसँगको भेटमा प्रधानमन्त्री प्रचण्डले जग्गा र क्षतिपूर्ति दिएर यथाशक्य चाँडो पुनस्र्थापनाका लागि प्रक्रिया अगाडि बढाउन प्रतिबद्धता जनाएका हुन्।

प्रधानमन्त्री भेट्न परराष्ट्रमन्त्री तथा कञ्चनपुर २ बाट निर्वाचित सांसद एनपी साउदको नेतृत्वमा सांसदहरु तारालामा तामाङ, प्रदेश सांसद ओमविक्रम भाट र आरक्ष पीडित संघर्ष समितिका पदाधिकारी तथा पीडितहरु बालुवाटार पुगेका थिए ।

पीडितका तर्फबाट संघर्ष समितिका सचिव प्रेमदत्त भट्टले प्रधानमन्त्रीलाई ज्ञापनपत्र बुझाएका थिए ।

पीडितको ज्ञापनपत्र बुझ्दै प्रधानमन्त्री प्रचण्डले १४८० परिवार पहिचान गरेको पूर्वन्यायाधीश ठाकुर प्रसाद शर्मा नेतृत्वको आरक्ष समस्या समाधान आयोगको निर्णय नियालेर अगाडि बढ्ने प्रतिबद्धता जनाएका छन् ।

आरक्ष पीडितसँगको छलफलमा राष्ट्रिय निकुञ्ज तथा वन्यजन्तु संरक्षण विभागका महानिर्देशक डा. महेश्वर ढकालले पैसा यो समस्या धेरै लामो समयदेखि थाँती रहेको भन्दै आर्थिक रुपमा मुआब्जा दिएर समाधान गर्नुपर्ने सुझाव दिएका थिए ।

परराष्ट्रमन्त्री साउदले आफ्नो क्षेत्रको यो धेरै पुरानो समस्या भएकाले चाँडो सम्बोधनका लागि निर्णय लिन प्रधानमन्त्रीको ध्यानाकर्षण गराएका थिए ।

कञ्चनपुर १ का सांसद तामाङका अनुसार तत्कालीन शाही शुक्लाफाँटा वन्यजन्तु आरक्ष विस्तारका क्रममा ०५८ सालमा विस्थापित भएका पीडितको अझै पुनर्स्थापना भएको छैन ।

राज्यले ३२ वटा आयोग बनाउँदा पनि पीडितले क्षतिपूर्ति तथा मुआब्जा पाएका छैनन् । उनले जग्गा बाँड्नेगरी स्वतन्त्र आयोग बनाएर पुनस्र्थापना गर्न प्रधानमन्त्रीलाई सुझाव दिएका छन् ।