+
+

पहिलो भ्रमण भारतबाटै गरेर नेपालका प्रधानमन्त्रीले भारतीय चाहना पूरा गरिरहेका छन् : उपाध्याय

अनलाइनखबर अनलाइनखबर
२०८० जेठ ११ गते १८:१४

११ जेठ, काठमाडौं। अख्तियार दुरुपयोग अनुसन्धान आयोगका पूर्वप्रमुख आयुक्त सूर्यनाथ उपाध्यायले नेपालका प्रधानमन्त्रीको पहिलो विदेश भ्रमण आफ्नो देशबाट होस् भन्ने भारतीयहरुको चाहना रहेको बताएका छन् ।

बिहीबार राष्ट्रिय सभाको राष्ट्रिय सरोकार तथा समन्वय समितिको बैठकमा उनले नेपालका प्रधानमन्त्रीहरुले पनि भारतको चाहना पूरा गर्दै आएको धारणा राखे ।

नेपालका प्रधानमन्त्रीले पहिलो विदेश भ्रमण भारतबाटै गरुन् भन्ने चाहना सन् १९५० को नेपाल–भारत शान्ति तथा मैत्री सन्धिमा घुमाउरो रुपमा राखिएको उपाध्यायको भनाइ छ ।

१९९० को नेपाल–भारत मैत्री सन्धिको धारा २ मा ‘दुवै सरकार परस्परमा कायम रहेका मित्रतापूर्ण सम्बन्धमा खलल पर्न जाने सम्भावना रहने गरी कुनै छिमेकीसँग गम्भीर खटपट वा विवाद उतपन्न भएमा एक अर्कालाई जानकारी दिन प्रतिवद्ध छन्’ भन्ने उल्लेख छ ।

उपाध्यायको तर्क छ, ‘कतिपय भारतीयको सार्वजनिक अभिव्यक्तिबाट तिमी (नेपाल) ले हामी (भारतीय) लाई सूचना दिनुपर्छ कि भन्ने खालले र झल्किने गर्छ ।’ यही कारण प्रधानमन्त्री भइसकेपछि भारत आउनुपर्छ भन्ने भारतीय चाहना देखिएको उपाध्यायको भनाइ छ ।

‘सायद त्यसैले पनि होला नेपालमा प्रधानमन्त्री भइसकेपछि म कहाँ, हामीकहाँ पहिले आउनुपर्छ भनेको । हामी त्यो आकांक्षालाई पुर्ति नै गरिरहेका छौं हाम्रो तर्फबाट । उताबाट के भइरहेको छ त्यो हामीले देखिहालेका छौं’, उपाध्यायले भने ।

प्रधानमन्त्री पुष्पकमल दाहाल प्रचण्डले यही जेठ १७ गतेबाट भारत भ्रमण गर्दैछन् । उनको यो कार्यकालमा पहिलो विदेश भ्रमण भारतबाटै हुन लागेको छ ।

यस विषयमा जेठ ४ गते प्रतिनिधिसभामा भएको प्रधानमन्त्रीसँगको प्रत्यक्ष प्रश्नोत्तर कार्यक्रममा समेत प्रश्न उठेको थियो ।

राष्ट्रिय जनमोर्चाका अध्यक्ष चित्रबहादुर केसीले नेपालमा नयाँ प्रधानमन्त्री भएपछि पहिलो विदेश भ्रमण भारतबाटै गर्नुपर्ने बाध्यता के होला ? भनेर सोधेका थिए ।

जवाफमा प्रधानमन्त्री प्रचण्डले पहिलो विदेश भ्रमण भारतबाटै गर्नुपर्ने बाध्यता नरहेको बताएका थिए । आफू पहिलो पटक प्रधानमन्त्री हुँदा पहिलो विदेश भ्रमण भारतबाट नगरेको उनले स्मरण गरेका थिए ।

प्रधानमन्त्री प्रचण्डले भनेका थिए, ‘भारतसँगको हाम्रो खुला सिमाना, आर्थिक, व्यापारिक, राजनीतिक संस्कृतिक सम्बन्धको विशिष्टता कारणले त्यो प्रचलन रहेको भए पनि त्यस्तो कुनै राजनीतिक बाध्यता छैन ।’

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?