टुलुजसँग लिभरपुलको आश्चर्यजनक हार

२४ कात्तिक, काठमाडौं । युरोपा लिग अन्तर्गत बिहीबार राति भएको खेलमा इंग्लिस क्लब लिभरपुल फ्रेन्च क्लब टुलुजसँग ३-२ ले पराजित भएको छ ।

खेलको अन्त्यतिर जारेल क्वान्साले बराबरी गोल फर्काए पनि त्यसलाई भिएबरले मान्यता नदिँदा लिभरपुलले आश्चर्यजनक हारे बेहोर्‍यो ।

इन्जुरी टाइमको सातौं मिनेटमा जारेलले गोल गर्दै लिभरपुलले खुशीयाली मनाउन थालिसकेको थियो । तर बुल्गेरियन रेफ्री जर्जी काबाकोभले भीएआरको सहयोग लिए । गोल अघि नै म्याक एलिस्टरले बल ह्याण्ड गरेको देखिएपछि भीएआरले गोल मान्यता दिएन ।

आरोन डोनुमले ३६औं र थिज डालिङ्गाले ५८औं मिनेटमा गोल गर्दै टुलुजलाई घरेलु मैदानमा दुई गोलको अग्रता दिलाएका थिए । टुलुजकै क्रिस्टियन कासेरेस ७४औं आत्मघाती गोल गरेपछि लिभरपुलको खेलमा फर्कने संकेत देखिएको थियो । तर फ्रांक माग्रीले ७६औं मिनेटमा गोल गर्दै टुलुजको ३-२ को अग्रता दिलाए । लिभरपुलका लागि वैकल्पिक खेलाडीको रुपमा मैदान प्रवेश गरेका डिएगो जोटाले ८९औं मिनेटमा गोल गर्दै गोल अन्तर कम पारे । तर हार टार्न पर्याप्त भएन ।

यस हारपछि समूह ई मा लिभरपुलको शतप्रतिशत जित यात्रा रोकिएको छ र चार खेलबाट लिभरपुल ९ अंकसहित शीर्ष स्थानमै छ । समान खेलबाट ७ अंक जोडेर टुलुज दोस्रो स्थानमा उक्लेको छ ।

बिहीबार राति भएका अन्य खेलमा इंग्लिस क्लबहरु ब्राइटनले आयाक्सलाई २-० र वेस्टह्यामले ओलम्पियाकोजलाई १-० ले पराजित गरेका छन्।

यस्तै रेन्सले पानाथिनाइकवसलाई ३-१ ले, भियारियालले मकाबी हाइफालाई २-१ ले, फेइवर्गले टीएससी बाक्का टोपोलोलाई ५-० ले, मार्सेले एइके एथेन्सलाई २-० ले, रियल बेटिसले अरिस लिमासोललले ४-१ ले, रेन्जर्सले स्पार्टा प्रागलाई २-१ ले, एटलान्टाले स्टर्म ग्राजलाई १-० ले र स्पोर्टिङ सिपीले राकोव चेस्टोचोवालाई २-१ ले पराजित गरेका छन् ।