बार्सिलोना कोपा डेल रे को क्वाटरफाइनलमा

५ माघ, काठमाडौं । तेस्रो श्रेणीको क्लब युनिओनिस्तास विरुद्ध पुनरागमन जित निकाल्दै बार्सिलोना कोपा डेल रे फुटबलको क्वाटरफाइनलमा प्रवेश गरेको छ ।

बिहीबार राति भएको खेलमा बार्सिलोनाले युनिओनिस्टास विरुद्ध एक गोलले पछि परेको स्थिति उल्टाउँदै ३-१ को जित निकालेको हो ।

अल्भारो गोमेजेले ३१औं मिनेटमा गोल गर्दै घरेलु टोली युनिओनिस्टासलाई पहिले अग्रता दिलाएका थिए ।

तर फेरान टोरेसले पहिलो हाफको अन्तिममा बार्सिलोनाका लागि बराबरी गोल फर्काए । त्यसपछि दोस्रो हाफमा बार्सिलोनाले दई गोल गर्‍यो ।

जुल्स कुन्डेले ६९औं मिनेटमा गोल गर्दै बार्सिलोनालाई २-१ को अग्रता दिलाए । त्यसपछि ७३औं मिनेटमा अलेजान्द्रो बाल्डेले गोल गर्दै बार्सिलोनाको जित पक्का गरे ।

स्पानिस सुपर कपको फाइनलमा रियल मड्रिडसँग पराजित भएपछि प्रशिक्षक जाभीले बार्सिलोनाको पहिलो रोजाइमा परिवर्तन गर्दै रोवर्ट लेवान्डोस्कीको स्थानमा मार्क गुइउलाई सुरुमा खेलाएका थिए ।