लाइन्स लियो फुटसल आयोजना हुने

१९ माघ, काठमाडौं । देशभर रहेका लाईन्स लियोबीच आन्तरिक खुल्ला फुटसल प्रतियोगिता माघ २७ र २८ गते आयोजना हुने भएको छ । शुक्रबार लायन्स एन्ड लियो क्लब अफ काठमाडौं प्रयासनगरले पत्रकार सम्मेलन आयोजना गर्दै प्रतियोगिता मिति घोषणा गरेको हो ।

दुई दिने प्रतियोगितामा देशभरबाट २० देखि ३० टोली सहभागी हुने क्लबका सचिव नविन न्यौपानेले बताएका छन् । ‘हामीसँग ३० भन्दा माथि क्लबहरु छन् । अहिलेसम्म १० क्लबले दर्ता गरिसकेका छन् । धेरै भन्दा धेरैलाई सहभागिता गराउँछौँ,’ सचिव न्यौपानेले भने ।

प्रतियोगिता मिट भ्याली कलेज ज्ञानेश्वरको मैदानमा हुनेछ । इच्छुक क्लबले तीन हजार दर्ता शुल्क तिरेर सहभागी हुन पाउनेछन् । क्लबका अध्यक्ष विराट केसीले सामाजिक कार्यबाट माथि उठेर भाइचारा सम्बन्ध बढाउन फुटसल प्रतियोगिता आयोजना गरेको बताए । ‘हामीले धेरै भन्दा धेरै सामाजिक कार्य गर्दै आएका छौँ । पछिल्लो वर्षदेखि भाइचारा सम्बन्ध बढाउन फुटसल प्रतियोगिता आयोजना थालेका हौँ ।’

प्रतियोगिताको विजेताले १५ र उपविजेताले आठ हजार पुरस्कार तथा ट्रफी पाउने अध्यक्ष केसीले बताए । सर्वाेत्कृष्ट खेलाडीले २५ सयसहित ट्रफी पाउनेछन् । प्रतियोगिता आयोजना गर्न अनुमानित एक लाख ५३ हजार खर्च हुने क्लबले जनाएको छ ।

अध्यक्ष केसीले क्लबभित्र जोडिएका राष्ट्रिय खेलाडीले पनि प्रतियोगितामा सहभागी हुन पाउने बताए । पत्रकार सम्मेलनमा लियो क्लब अफ काठमाडौं छाब्दी बाराहीका अध्यक्ष मन्जिता परियारलगायत युवाहरुको सहभागिता थियो ।