राष्ट्रिय टिमबाट डेब्यूपछि समीरले देखेको सपना

११ चैत, मानामा (बहराइन) । बारा निजगढका १९ वर्षीय समीर तामाङ स्कुल पढ्दा क्रिकेट खेल्थे । क्रिकेटमा विकेटकिपिङ गर्ने उनले फुटबल खेल्दा पनि सुरुमा गोलकिपरको भूमिकामा खेले ।

गोलकिपिङ गर्दा हातमा चोट लागेपछि उनी फरवार्डमा खेल्न थाले । उनै समीरले फिफा विश्वकप र एएफसी एसियन कपको संयुक्त छनोट अन्तर्गत बिहीबार बहराइनसँगको खेलमा नेपाली राष्ट्रिय टिमबाट खेल्ने आकांक्षा पूरा गरेका छन् ।

‘पहिलेदेखिको सपना थियो, त्यसैले राष्ट्रिय टिममा डेब्यू क्षण मेरो लागि विशेष थियो’,  समीरले अनलाइनखबरसँग भने, ‘त्यो क्षणमा मलाई घरको धेरै सम्झना आयो । मैले मेरी ममीलाई विशेष रुपमा सम्झिएँ ।’

बहराइनको रिफास्थित नेशनल स्टेडियममा भएको खेलमा ७९ औं मिनेटमा हिसुब थपलियाको स्थानमा मैदान प्रवेश गर्दै समीरले नेपालको सिनियर टिमबाट डेब्यू गरे । उनले करिब १० मिनेट मात्र मैदानमा बिताए । ८८ औं मिनेटमा समीरलाई रिप्लेस गर्दै अर्का फरवार्ड सञ्जीव विष्टले पनि राष्ट्रिय टिममा डेब्यू गरे ।

राष्ट्रिय टिमबाट १० मिनेट मात्र खेल्न पाए पनि समीरले १९ वर्षमै पाएको यो उपलब्धीलाई चानचुने मानेका छैनन् । ‘मैले यति चाँडै डेब्यू गर्छु भनेर सोचेको पनि थिइनँ । अझ बहराइन कठिन प्रतिद्वन्द्वी थियो र त्यस्तो टिमसँग मैले पनि खेलेँ भन्दा अर्कै खालको ऊर्जा आउने रहेछ’, उनी भन्छन् ।

समीर तीब्र गतिका खेलाडी हुन् । उनले बल पाएपछि विपक्षी डिफेण्डरलाई दबाब दिने काम गर्छन् ।

सिधै राष्ट्रिय टिममा

समीरले यसअघि नेपालको यू-२० राष्ट्रिय टिमबाट खेलेका थिए । तर उनले अहिलेसम्म घरेलु लिग खेलेका छैनन् । फुटबल विकासको मेरुदण्ड नै लिगलाई मानिन्छ । नेपालमा लिग नियमित नहुँदा खेलाडीहरु फरक तरिकाले राष्ट्रिय टिमसम्म पुगेका उदाहरण छन् ।

त्यसमा समीर पनि परेका छन् । ‘लिग खेलेकै आधारमा कोचहरुले राष्ट्रिय टिमका लागि छनोट गर्नुहुन्छ । तर मेरो हकमा अनौठो भयो’, उनले भने ।

गत असोजमा काठमाडौंमै भएको साफ यू-२० च्याम्पियनसिपमा समीरले नेपालका लागि ३ गोल गरेका थिए र सर्वाधिक गोल गर्नेमा संयुक्त रुपमा शीर्ष स्थानमा थिए ।

उनी यु-२० को राष्ट्रिय टिमका लागि जिल्ला, प्रदेश र केन्द्रीय स्तरको छनोटबाट छानिएर अन्तिम २३ जनाको सूचीमा समावेश भएका थिए । त्यसमा उनले आफूलाई प्रमाणित पनि गरेर देखाए ।

समूह चरणमा श्रीलंकाविरुद्ध ४-१ को जितमा दुई गोल गरेका समीरले सेमिफाइनलमा भारतविरुद्ध एक गोलले पछि परेको स्थितिमा बराबरी गोल फर्काए । तर उक्त खेलमा नेपाल पेनाल्टी सुटआउटमा भारतसँग पराजित हुँदै फाइनल पुग्न असफल भयो । तर समीरले भने करियरमा फड्को मारे ।

घरेलु मैदानमा अन्तर्राष्ट्रिय खेल खेल्दाको अनुभव पनि उनले बटुले । ‘नेपालीहरुको अगाडि खेल्दा छुट्दै जोश र उर्जा आउने रहेछ’, समीर दशरथ रंगशालामा खेल्दाको अनुभव सुनाउँछन् ।

यु-२० टिमबाट राम्रो प्रदर्शन गरेपछि समीर राष्ट्रिय टिमको बन्द प्रशिक्षणमा परे । तर चोटका कारण त्यसबेला उनी बन्द प्रशिक्षणमा जान सकेनन् ।

समीरले गत माघमा पोखरामा भएको आहारारा पोखरा गोल्डकपमा चर्च ब्वाइज क्लबबाट पहिलो पटक घरेलु फुटबल खेले । त्यहाँ उनले नेपाल पुलिस क्लब र त्रिभुवन आर्मी क्लबविरुद्ध गोल गरेका थिए । अहिलेसम्म उनले खेलेको क्लब चर्च ब्वाइज मात्रै हो ।

गत २७ माघमा चिनिया प्रान्तीय टिमविरुद्ध नेपालको यू-२३ टिमले काठमाडौंमा खेलेको खेलमा समीर पनि टिममा थिए । पहिलो रोजाईमा खेलेका उनले नेपालका लागि दुई गोलसमेत गरेका थिए ।

त्यसपछि उनी बहराइनविरुद्ध हुने दुई खेलका लागि सिनियर टिममा पर्न सफल भए । बहराइनविरुद्धको खेलअघि नेपाली टोली मलेसियासँग अभ्यास खेल खेल्न गएको थियो । २ चैतमा मलेसियाविरुद्धको खेलमा वैकल्पिक खेलाडीको रुपमा मैदान प्रवेश गरेका उनले नेपालका लागि एक गोल गरेका थिए । उक्त खेलमा नेपाल मलेसियासँग ४-१ ले पराजित भएको थियो ।

पढाइ छाडेर फुटबल

स्कुलमा पढ्दा समीरले सुरुमा क्रिकेट खेल्थे र त्यसमा पनि विकेटकिपरको भूमिकामा हुन्थे । एक दिन उनले आफूभन्दा ठूलाहरुको टिममा गोलकिपरको भूमिका पाए । ‘ गोलकिपर नआएकाले मैले त्यो भूमिका खेलेँ । ग्लोभ्स हुँदैनथ्यो । इँटा राखेर पोस्ट बनाइएको हुन्थ्यो । त्यो दिन मेरो औंलामा चोट लाग्यो’, समीरले फुटबल खेल्दाको सुरुवाती दिन सम्झिए ।

त्यसपछि उनले क्रिकेट छाडेर फुटबल खेले र फुटबलमा पनि फरवार्डका रुपमा खेल्न थाले । उनी पढ्न भन्दा पनि फुटबल खेल्नमै केन्द्रित थिए ।

फुटबल खेल्न थालेपछि उनले पढाइ पनि छाडे । उनको ध्यान फुटबलमै भएपछि घर परिवारले पनि साथ दियो । उनले स्थानीय स्तरका धेरै प्रतियोगिता खेले । एक दिन उनले साफ यू-२० का लागि खेलाडी छनोट हुँदैछ भन्ने थाहा पाए  र त्यसमा सहभागी भए ।

जितपुर सिमरामा भएको जिल्लास्तरीय छनोट पार गरेर उनी प्रदेशस्तरीय छनोटका लागि सर्लाहीको लालबन्दी पुगे । त्यहाँ पनि छनोट भएर उनी राष्ट्रिय स्तरको छनोटका लागि काठमाडौं पुगे । त्यहाँ प्रशिक्षणपछि उनी यू-२० साफका लागि अन्तिम टोलीमा छनोट भए ।

खेलमा उनको गति राम्रो भए पनि फिनसिङमा केही समस्या थियो । यू-२० टिममा परेपछि उनले त्यसमा धेरै मिहिनेत गरे । जसको नतिजा समीरले साफ यू-२० च्याम्पियनसिपमा ३ गोल गरेर देखाए ।

अझ धेरै सपना बाँकी छ

राष्ट्रिय टिमबाट डेब्यू गरेपछि समीरले आफ्नो करिअरमा अझै ठूलो चुनौती आएको महसुस गरेका छन् । ‘छोटो समयमै यति गर्न सकेँ भने करियर त बल्ल सुरु भएको छ । अझै मिहिनेत गरेँ भने यो भन्दा अझ राम्रो गर्न सक्छु’, समीर भन्छन् ।

उनी नेपालका लागि उपाधि जित्न चाहन्छन् । पोर्चुगलका क्रिस्टियानो रोनाल्डोबाट प्रभावित समीरलाई नेपालमै सर्वाधिक गोलकर्तामध्येका एक अञ्जन विष्टको खेल मन पर्छ ।

‘म पनि यस्तै बन्न पाए हुन्थ्यो भन्ने लाग्थ्यो । अहिले राष्ट्रिय टिममा सँगै खेल्न पाउँदा ड्रिम कम ट्रु जस्तै भएको छ’, समीरले भने, ‘दाइहरुले पनि अझै राम्रो गर्नुपर्छ भनेर हौसला दिनुहुन्छ ।’