यो पनि पढ्नुहोस
डा. मनिषा मल्ल बाल दन्तरोग विशेषज्ञ
बच्चाको दाँत कति महिनाभित्र आइसक्छ ?
२०८० चैत १८ गते १४:३५
डा. मनिषा मल्ल बाल दन्तरोग विशेषज्ञ
शिशु जन्मिएको ६ महिना पुगेपछि दाँत उम्रिन थाल्छ । यसलाई दूध दाँत भनिन्छ । तर बच्चाहरुको दाँत आउने उमेर भने एउटै हुँदैन । कसैको ६ महिनामै आउँछ भने कसैको ११ महिनामा पनि आउने गर्छ । दूधे दाँत २० वटासम्म आउँछ, जुन ३६ महिनाको अवधिभित्र आइसक्छ ।
त्यसपछि ६ देखि १२ वर्षको उमेरबीचमा दूधे दाँत झर्न थाल्छ र स्थायी दाँत उम्रिने क्रम सुरु हुन्छ । जसलाई मेडिकल भाषामा ‘सेकेन्डरी युरुपसन अफ टिथ’ भनिन्छ ।
दूधे दाँत सुरुमा अगाडिकझ आउँछ । कसैको एकैचोटि दुईवटा आउन सक्छ भने कसैको एक-एक वटा गरी पनि उम्रिने गर्छ ।
दूधे दाँत उम्रिने बेलामा बच्चामा आउने परिवर्तन
दाँत उम्रिने समयमा गिजा सुन्निने वा रातो हुने, र्याल बढी चुहाउने, जे पनि खानेकुरा पनि मुखमा हाल्ने, गिजा दुख्ने, चिलाउने र ज्वरो आउने हुनसक्छ । कसैलाई दाँत आउने बेलामा दुखेर खाना खान गाह्रो हुने, दुखाइले निद्रामा समस्या हुने हुन्छ ।
के गर्ने ?
बच्चाको दाँत उम्रिने बेला केरा, उसिनेको स्याउ, फलफूल, गाँजर, काँक्रो जस्ता खानेकुरा चपाउन दिनुपर्छ । यसले बच्चालाई दाँत दुखेको र चिलाएर कम हुन्छ ।
के कारण दाँत ढिलो आउँछ ?
शरीरमा पोषक तत्वको कमी, वंशाणुगत, थाइराइड र अन्य हार्मोनको समस्या भिटामिन डीको कमी समय अगावै शिशुको जन्म भएमा, शिशुको मन तौल भएमा र मानसिक समस्या हुनाले पनि दाँत ढिलो आउँछ ।
दाँत नआउने पनि हुनसक्छ ?
पहिलो दाँत ११ महिनाभित्र नआएमा सम्बन्धित चिकित्सकलाई जाँच गराउनुपर्छ । यस्तो अवस्थामा आवश्यकताअनुसार औषधि खुवाउनुपर्ने हुनसक्छ ।
कसरी जोगाउने दूधे दाँत ?
बच्चाको पहिलो दाँत आएको ६ महिनाभित्र चिकित्सकलाई जाँच गराउनुपर्छ । यसले गर्दा दाँतलाई कसरी सुरक्षित गर्ने भन्ने बारेमा जानकारी हुन्छ ।
बच्चाको दाँत आउन थालिसकेपछि दाँत माझिदिने गर्नुपर्छ । एउटा मात्र भएपनि दाँत माझ्नुपर्छ ।
बिहान बेलुका बच्चाले खाना खाइसकेपछि दाँत माझ्ने गराउनुपर्छ । यसले दाँतलाई बलियो बनाउन मद्दत गर्छ ।
दूधे दाँत कहिले झर्छ ?
बच्चाहरुको ६ वर्षदेखि दूधे दाँत झर्न सुरु हुन्छ र लगभग १२-१३ वर्षसम्म सबै दूधे दाँत झरेर नयाँ दाँत आउने गर्छ ।
प्रतिक्रिया 4