गोरखा–५ मा बाबुराम नेतृत्वको पार्टीसहित ६ दलका उम्मेदवारको धरौटी जफत

१८ मंसिर, गोरखा । आइतबार सम्पन्न उपनिर्वाचन अन्तर्गत ६ वटा राजनीतिक दलका उम्मेदवारहरूको धरौटी जफत भएको छ ।

जिल्ला निर्वाचन कार्यालयका अनुसार नेकपा एमाले, नेपाली कांग्रेस र माओवादी केन्द्रबाहेकका सबै दलको धरौटी जफत भएको छ । सदर मतको १० प्रतिशत भन्दा कम ल्याउने उम्मेदवारको धरौटी जफत हुने प्रावधान छ ।

जस अनुसार, डा. बाबुराम भट्टराई नेतृत्वको नेपाल समाजवादी पार्टी (नयाँ शक्ति), राष्ट्रिय स्वतन्त्र पार्टी (रास्वपा) लगायत दलको धरौटी जफत भएको हो ।

‘कुल १३ सय ५५ मत खसेको थियो,’ निर्वाचन कार्यालयका सूचना अधिकारी रविलाल सुवेदीले भने, ‘धरौटी जफत नहुनलाई त्यसको दश प्रतिशत अर्थात् १३६ मत ल्याउनुपर्ने थियो ।’

तर भट्टराई नेतृत्वको पार्टीका उम्मेदवारले कुल १० मत मात्र प्राप्त गरे । त्यस्तै रास्वपाका उम्मेदवारले ८२ मत प्राप्त गरे । यहाँको उपनिर्वाचनमा कुल ९ दलले उम्मेदवारी दिएका थिए ।