२०८१ मंसिर २७ गते १९:०७ 
२७ मंसिर, इलाम । डिफेन्डिङ च्याम्पियन न्यूरोड टिम (एनआरटी) इलाम गोल्डकपको फाइनलमा प्रवेश गरेको छ ।
इलाममा जारी एनआरएनए दोस्रो इलाम गोल्डकप प्रतियोगिताको दोस्रो सेमिफाइनल खेलमा झापाको रेडस्टार फुटबल क्लबलाई २–१ गोलले पराजित गर्दै एनआरटी फाइनलमा प्रवेश गरेको हो ।
एनआरटीका लागि इलाम गोल्डकपमा डेब्यु गरेका अञ्जन विष्टले एनआरटीका लागि डेब्यु गोल गर्ने अवसर प्राप्त गरे । खेलको ४५औं मिनेटमा अञ्जनले पेनाल्टीमार्फत गोल गर्दै अग्रता दिलाएका थिए । डिबक्सभित्र अञ्जन विष्टलाई रेडस्टारका विशाल दर्जीले फाउल गरेपछि एनआरटीले पेनल्टीको अवसर पाएको थियो ।
पहिलो हाफमा एक गोलले अग्रता पाएको एनआरटीले दोस्रो हाफको ८ मिनेटसम्म पनि अग्रता जोगाउन सकेन । ५३औं मिनेटमा रेडस्टारका विदेशी खेलाडी इमानुएल बोटेजले बराबरी गोल गरे ।
खेलको ६१औं मिनेटमा एनआरटीले पाएको अवसरलाई विवेक गुरुङले सदुपयोग गर्दै निर्णयक गोल गरे । डिबक्सबाट प्रहार गरेको बलले जाली चुमेपछि डिफेन्डिङ च्याम्पियन एनआरटीले उपाधिका लागि चर्च ब्वाइजसँगको भेट पक्का गरेको हो ।
खेलमा एनआरटीका अञ्जन विष्ट म्यान अफ दी म्याच घोषित भए । एनआरटीले जीटीए दार्जिलिङ भारत र रेड स्टारले मच्छिन्द्र फुटबल क्लबलाई पराजित गर्दै सेमिफाइनलको यात्रा तय गरेको थियो ।
२२ मंसिरदेखि सुरु भएको गोल्डपको फाइनल खेल २९ मंसिरमा हुनेछ । यस गोल्डकपको विजेताले १० लाख र उपविजेताले ५ लाख रुपैयाँ प्राप्त गर्नेछ ।
प्रतिक्रिया 4