२०८१ पुष २२ गते ७:५१ 
२२ पुस, काठमाडौं । इंग्लिस प्रिमियर लिग फुटबलअन्तर्गत गएराति भएको खेलमा दुई परिचित प्रतिद्वन्दी लिभरपुल र म्यान्चेस्टर युनाइटेडले रोमाञ्चक बराबरी खेलेका छन् । लिभरपुलको घरेलु मैदान एनफिल्डमा भएको खेल २-२ को बराबरीमा सकिएको हो ।
खेलका सबै गोल दोस्रो हाफमा भएका थिए । युनाइटेडले खेलमा सुरूवाती अग्रता लिएर लिभरपुलले पुनरागमन गरेपछि अन्तिममा युनाइटेडले गोल गर्दै खेल बराबरीमा ल्याएको थियो ।
लिभरपुलका कोडी गाक्पो र मोहमद सालाहले एक-एक गोल गरे भने युनाइटेडका लिसान्द्रो मार्टिनेज र अमाद डियालोले एक-एक गोल गरे ।
खेलको ५२औं मिनेटमा लिसान्द्रोले गोल गर्दै पाहुना टोलीलाई अग्रता दिलाएका थिए । त्यसको सात मिनेटपछि गाक्पोले गोल गर्दै खेल बराबरीमा ल्याए ।
७०औं मिनेटमा सालाहले गोल गरेपछि खेलमा लिभरपुलले अग्रता लियो । तर अन्त्यसम्म भने जोगाउन सकेन । ८०औं मिनेटमा अमादले गोल गर्दै खेल फेरि बराबरीमा ल्याए र २-२ को बराबरीमा टुङ्गियो ।
बराबरीपछि लिग लिडर लिभरपुलको १९ खेलमा ४६ अंक भएको छ । युनाइटेड २० खेलमा २३ अंकसहित १३औं स्थानमा छ ।
प्रतिक्रिया 4