‘बर्खे अधिवेशनको पहिलो साता नै विद्यालय शिक्षा विधेयक पेस गर्न सकिँदैन’

३ वैशाख, काठमाडौं । संसदको शिक्षा, स्वास्थ्य तथा सूचना प्रविधि समितिका सभापति अम्मर बहादुर थापाले बजेट अधिवेशन सुरु भएको पहिलो साता नै विद्यालय शिक्षा विधेयक पेस गर्न नसकिने बताएका छन् ।

समितिको उपसमितिमा हाल दफावार छलफल चलिरहेको बताउँदै सभापति थापाले प्रक्रिया अनुसार जाँदा पनि जेठमा मात्र सम्भव हुने बताए ।

‘उपसमितिले १९ वैशाखमा प्रतिवेदन बुझाउने समय हो । अधिवेशन सुरु भएको पहिलो साता नै विधेयक संसद्मा पेस गर्न सकिँदैन,’ अनलाइनखबरसँग उनले भने, ‘उपसमितिबाट प्रतिवेदन आएपछि पनि फुल समितिबाट टुंगो लगाउन अर्को २० दिन लाग्छ ।’

सरकारले कुनै तवरबाट ल्याए थाहा भएन नभए अधिवेशनको सुरुमा पेस गर्न नसकिने उनले स्पष्ट पारे । ‘नहुने कुरा गरेर हुँदैन । सरकारले छुट्टै ल्याए थाहा छैन । समितिबाट जान जेठ लाग्छ,’ उनले भने ।

यसअघि सभामुख देवराज घिमिरेले पनि वर्षे अधिवेशनमा बजेटलाई प्राथमिकता दिनुपर्ने भएकाले शिक्षासँग सम्बन्धित विषय सम्बोधन गर्न नकिने बताएका थिए । शिक्षक महासंघले भने शिक्षा ऐन जारी नभएसम्म आन्दोलन जारी राख्ने बताएको छ ।