जादु चलाएर सरकार बनाउने पक्षमा छैनौं : प्रचण्ड

२२ वैशाख, काठमाडौं । नेकपा (माओवादी केन्द्र)का अध्यक्ष पुष्पकमल दाहालले अहिले आफूहरूको ध्यान सरकार बनाउनेतर्फ नभएको बताएका छन् । सोमबार संसद् भवन परिसरमा सञ्चारकर्मीसँग कुराकानी गर्दै उनले आफ्नो पार्टीको ध्यान जनतामा जाने बताए ।

साथै, उनले छिट्टै मध्यपहाडी लोकमार्ग अभियान गइरहेको पनि बताए ।

‘अहिले हाम्रो ध्यान सरकार बनाउनेतिर छैन । हाम्रो ध्यान जनतामै जाने छ,’ प्रचण्डले भने, ‘हामी मध्यपहाडी लोकमार्ग अभियान हामी जाँदैछौं । जादु चलाउन चाहे त चल्छ तर अहिले हामी चलाउने पक्षमा छैनौं ।’

उनले आफू नेपाली कांग्रेसका सभापति शेरबहादुर देउवालाई फकाउने प्रयासमा पनि नभएको बताए ।

‘हामी देउवाजी कसैलाई पनि फकाउने पक्षमा छैनौं । आफ्नै बोझले यो सरकार ढल्छ, जनताको मनबाट त यो ढलिसकेको छ,’ प्रचण्डले भने ।

साथै, उनले सरकारले ल्याएको नीति तथा कार्यक्रम औपचारिक र कर्मकाण्डी भएको टिप्पणी गरे ।

सरकारले प्रस्तुत गरेको आगामी आर्थिक वर्षको नीति तथा कार्यक्रम जनभावनाअनुसार नभई औपचारिकता पूरा गर्न मात्र ल्याइएको टिप्पणी गरेका छन् ।

सरकारले जनभावना र राष्ट्रको आवश्यकताअनुरुपको नीति तथा कार्यक्रम ल्याउन नसकेको आरोप लगाउँदै उनले आफूले देशका विभिन्न भागमा जनतासँग संवाद गर्दा उठेका आवश्यकतालाई प्राथमिकतामा राखेर नीति तथा तथा कार्यक्रममाथि धारणा राखेको दाबी गरे ।

‘गतवर्षको नीति तथा कार्यक्रम कपिपेस्ट गर्नुपनि झारा टार्नु नै हो । किनभने यो एकवर्षको अवधिमा धेरै नै विकास भइसकेको छ । नयाँ सिर्जनात्मक, रचनात्मक र जनता र राष्ट्र पक्षमा केही पनि कुरा छैन,’ प्रचण्डले भने ।