सगरमाथा संवाद’ सहज बनाउन भारतले दियो १५ युनिट कर्भ ईभी उपहार

News Summary

Generated by OK AI. Editorially reviewed.

नेपालले आयोजना गर्न लागेको ‘सगरमाथा संवाद’लाई सहज बनाउन भारतले १५ युनिट कर्भ ईभी उपहार दिएको छ।
यी सवारीसाधनले संवादको समयमा अतिथि र अधिकारीको आवागमन सहज बनाउन मद्दत गर्ने भारतीय दूतावासले जनाएको छ।
परराष्ट्रमन्त्री राणाले भारतको सहयोगप्रति कृतज्ञता व्यक्त गर्दै नेपाल र भारतबीचको विकास साझेदारीको महत्त्व व्यक्त गरे।

२९ वैशाख, काठमाडौं । नेपालले आयोजना गर्न गइरहेको ‘सगरमाथा संवाद’ सहज बनाउन भारतले नेपाललाई १५ युनिट कर्भ ईभी उपहार प्रदान गरेको छ ।

ती ईभी नेपालका लागि भारतीय राजदूत नवीन श्रीवास्तवले सोमबार परराष्ट्रमन्त्री डा. आरजु राणालाई हस्तान्तरण गरे ।

मित्रता र सद्भावनाको एक महत्त्वपूर्ण संकेतका रूपमा ईभी उपहार दिइएको भारतीय दूवातासले जनाएको छ । ‘जलवायु परिवर्तन, हिमाल र मानवताको भविष्य’ भन्ने विषयमा २–४ जेठमा काठमाडौंमा हुन लागेको ‘सगरमाथा संवाद’ को पहिलो संस्करणको प्रभावकारी आयोजनालाई सहजीकरण गर्न नेपाल सरकारलाई लजिस्टिक सहयोगका लागि भारतका तर्फबाट उपहार स्वरूप यी सवारीसाधन प्रदान गरिएको हो ।

कर्भ ईभी हस्तान्तरण समारोहमा बोल्दै राजदूत श्रीवास्तवले यी सवारीसाधनले संवादको समयमा अतिथि र अधिकारीको आवागमन सहज बनाउन मद्दत गर्ने कुरा उल्लेख गरे ।
उनले सन् २०२२ मा संघीय र प्रदेशसभा निर्वाचन सञ्चालनका लागि भारत सरकारले कानुन कार्यान्वयन गर्ने निकाय र निर्वाचन आयोगलाई प्रदान गरेको यस्तै लजिस्टिक सहयोगको स्मरण गरे।

सवारीसाधन ग्रहण गर्दै परराष्ट्रमन्त्री राणाले संवाद आयोजनालाई सहजीकरण गर्न भारतले गरेको सहयोगप्रति कृतज्ञता व्यक्त गरिन् ।