सरकारले व्यापारीलाई एक वर्षमा दियो ८० अर्ब भन्सार छुट

News Summary

Generated by OK AI. Editorially reviewed.

सरकारले २०८०/८१ मा व्यापारीलाई कर छुटको रूपमा करिब ७९ अर्ब रुपैयाँ बराबरको भन्सार राजस्व छुट दिएको पाइएको छ।
महालेखा परीक्षकको प्रतिवेदन अनुसार, यी छुटहरूको अभिलेख अर्थ मन्त्रालय वा आन्तरिक राजस्व विभागसँग नराखिएको भेटिएको छ।
राजस्व छुटको दायरा बढ्दै गएकोले यसको विश्लेषण र एकीकृत तथ्यांक संसद्‍मा पेस गर्न सुझाव दिइएको छ।

३१ वैशाख, काठमाडौं । सरकारले व्यापारीलाई एक वर्ष अवधिमा ७९ अर्ब ८७ करोड रुपैयाँ बराबर भन्सार राजस्व छुट दिएको पाइएको छ ।

आव २०८०/८१ मा सरकारले उक्त रकम बराबर भन्सार राजस्व छुट दिएको महालेखा परीक्षकको कार्यालयको ६२औं वार्षिक प्रतिवेदनमा उल्लेख छ । सरकारले आर्थिक ऐनमार्फत यस्तो छुट दिएको पाइएको छ ।

आसिकुडा प्रणाली अनुसार उक्त छुट रकम देखिएको हो । आर्थिक ऐनबाट आन्तरिक राजस्वतर्फ कति छुट दिइयो भन्ने अभिलेख भने राखेको नपाइएको महालेखाले आफ्नो प्रतिवेदनमा उल्लेख गरेको छ ।

यस्तो अभिलेख अर्थ मन्त्रालय वा आन्तरिक राजस्व विभागसँग नरहेको पाइएको छ । उता, साफ्टा सुविधा अन्तर्गत मालवस्तु पैठारी गर्दा भन्सार महसुल ४ अर्ब ८७ करोड ८८ लाख रुपैयाँ र मूल्य अभिवृद्धि कर छुट भएको महालेखाले जनाएको छ ।

सम्बन्धित आयोजनाले बोलपत्र आह्वान गर्नु अगावै मास्टरलिस्ट स्वीकृत गराएको अवस्थामा मात्र छुट दिने र सुविधामा पैठारी भएका मालवस्तु उपयोग सोही आयोजनामा भए–नभएको अनुगमन गर्नुपर्ने प्रावधान महालेखाले स्मरण गराएको छ । राजस्व छुटको दायरा बढ्दै गएको भन्दै यसको विश्लेषण गर्न र एकीकृत तथ्यांक संसद्‍मा पेस गर्नसमेत सुझाव दिएको छ ।