सान्भी इनर्जीको आईपीओ ९ गतेदेखि खुल्ने, कस्तो छ कम्पनी ?

News Summary

Generated by OK AI. Editorially reviewed.

सर्वसाधारणका लागि सान्भी इनर्जीको आईपीओ जेठ ९ देखि १३ सम्म खुल्नेछ र न्यूनतम १० हजारदेखि अधिकतम २० हजार कित्तासम्म आवेदन गर्न सकिन्छ।
कम्पनीले इलाममा ७.६ मेगावाटको जलविद्युत आयोजना सञ्चालन गरिरहेको छ र अर्को ५.२ मेगावाटको आयोजना निर्माणाधीन अवस्थामा छ, जसको लागत क्रमशः २० करोड ६९ लाख र १९ करोड ४० लाख रुपैयाँ छ।
कम्पनीको बीबी प्लस रेटिङ्ग प्राप्त भएको छ र प्रतिसेयर नेटवर्थ १२४ रुपैयाँ भए पनि १२ करोड रुपैयाँको सञ्चित नोक्सानीमा रहेको जानकारी दिइएको छ।

१ जेठ, काठमाडौं । सर्वसाधारणका लागि सान्भी इनर्जीको प्राथमिक सेयर (आईपीओ) जेठ ९ गतेदेखि खुल्ने भएको छ । यसअघि आयोजना प्रभावित र वैदेशिक रोजगारमा रहेकालाई आईपीओ बाँडफाँट भइसकेको छ ।

सर्वसाधारणले जेठ ९ देखि १३ गतेसम्म कम्पनीमा आवेदन दिन सक्नेछन् । बिक्री प्रवन्धक एसबीआई मर्चेन्ट बैंकिङ रहेको छ । न्यूनतम १० तथा अधिकतम २० हजार कित्तासम्म आवेदन दिन सकिनेछ । अनलाइन प्रणाली मेरोसेयरमार्फत आवेदन दिन सकिने सार्वजनिक सूचनामा उल्लेख छ ।

कम्पनीले कुल ३७ लाख ९० हजार कित्ता सेयर सर्वसाधारण समूहमा जारी गर्न लागेको हो । जसमध्ये म्युचुअल फन्ड, प्रभावित स्थानीय, कर्मचारी, वैदेशिक रोजगारमा रहेकालाई छुट्याएपछि सर्वसाधारणमा २४ लाख १५ हजार ३ सय कित्ता सेयर जारी हुन लागेको हो ।

कस्तो छ कम्पनी ?

यस कम्पनीले इलामको सूर्योदय नगरपालिकामा जोगमई खोलामा ७.६ मेगावाटको आयोजना सञ्चालन गरिरहेको छ । यो आयोजनाबाट कम्पनीले आम्दानी गरिरहेको छ । जसको कुल लागत १ अर्ब ५७ करोड २९ लाख रुपैयाँ छ । प्रतिमेगावाट लागत २० करोड ६९ लाख रुपैयाँ छ ।

साथै कम्पनीले ५.२ मेगावाटको जोगमइ क्यासकेड जलविद्युत् आयोजना बनाएको छ । निर्माणाधिन अवस्थामा रहेको यो आयोजनाको लागत प्रतिमेगावाट १९ करोड ४० लाख रुपैयाँ छ ।

केयर रेटिङ्सबाट कम्पनीले बीबी प्लस रेटिङ पाएको छ । जुन रेटिङले औसत जोखिमलाई जनाउँछ ।

गत पुस मसान्तसम्म कम्पनीको प्रतिसेयर नेटवर्थ १२४ रुपैयाँ छ । प्रतिसेयर आम्दानी ३ रुपैयाँ ८१ पैसा छ भने १२ करोड रुपैयाँ सञ्चित नोक्सानीमा छ ।