पोखरा विमानस्थलको उपसमितिमा जनार्दन रहँदा योगेशको आपत्ति, भने- स्वार्थ बाझिएन ?

News Summary

Generated by OK AI. Editorially reviewed.

सांसद योगेशकुमार भट्टराईले पोखरा अन्तर्राष्ट्रिय विमानस्थल अनियमितता छानबिनमा संलग्न सदस्य जनार्दन शर्मामाथि प्रश्न उठाए।
निर्णय प्रक्रियामा रहेका तत्कालीन अर्थमन्त्री शर्मा उपसमितिमा हुँदा स्वार्थको द्वन्द्व हुने उनले शंका गरे।

७ जेठ, काठमाडौं । नेकपा एमालेका सांसद योगेशकुमार भट्टराईले पोखरा अन्तर्राष्ट्रिय विमानस्थल निर्माणको क्रममा भएको अनियमिता छानबिन गर्न बनेको उपसमितिका भएका सदस्यमाथि प्रश्न उठाएका छन् ।

बुधबार लेखा समितिको बैठकमा भाग लिँदै सांसद भट्टराईले अहिले उपसमितिमा भएका सदस्य नै त्यतिबेला निर्णय प्रक्रियामा रहेकोले स्वार्थको द्वन्द्व हुन्छ कि ? भन्दै प्रश्न गरे ।

उनले तत्कालीन अर्थमन्त्री जनार्दन शर्मा निर्णय प्रक्रियामा पनि रहेको र उपसमितिको सदस्य पनि रहेकाले स्वार्थको द्वन्द्व हुनसक्ने जिकिर गरे ।

‘भैरहवाकै प्रतिवेदन बनाउन तपाईंले मलाई रोक्नुहुन्छ भने यो पनि मान्न सकिँदैन । महालेखाको पनि आफ्नै रिपोर्ट होला । मलाई केही भन्नु छैन । तत्कालीन अर्थमन्त्रीज्यू (शर्मा) जो अहिले उपसमितिको सदस्य हुनुहुन्छ,’ भट्टराईले भने, ‘उहाँले २०७८ भदौ २ गते र २०७८ असोज १९ गते भन्सार छुटको निम्ति स्वीकृति दिनुभएको छ । उहाँ नै बसेर यो प्रतिवेदन बनाइरहनुभएको छ । अनि कसरी द्वन्द्वको स्वार्थ बाझिएन भन्ने ? निर्णय प्रक्रियामा भएको मान्छे छानबिन समितिमा कसरी बस्ने ?’

उपसमितिको संयोजक राप्रपा अध्यक्ष एवं सांसद राजेन्द्र लिङ्देन छन् । सदस्यहरू लेखनाथ दाहाल, अर्जुनरसिंह केसी, गोकुलप्रसाद बाँस्कोटा, जनार्दन शर्मा, प्रेमबहादुर आले, तारा लामा, तेजुलाल चौधरी, दीपक गिरी, देवप्रसाद तिमिल्सिना, रामकृष्ण यादव र रुक्मणी राना छन् ।