लेखा समितिमा मञ्जु खाँण र असिम शाहबीच चर्काचर्की

News Summary

Generated by OK AI. Editorially reviewed.

सार्वजनिक लेखा समितिमा दुई सांसदबीच चर्काचर्की भएको छ ।
लेखा समितिका सदस्य एवं सांसद मञ्जु खाँड र सांसद असिम शाहबीच चर्काचर्की भएको हो ।
अरु सांसदहरूले संयम रहन आग्रह गरेपछि दुवैबीचको चर्काचर्की साम्य भएको थियो ।

७ फागुन, काठमाडौं । अनुसन्धानको दायरामा परेको व्यक्तिलाई छानबिन उपसमितिको संयोजक बनाएकोमा प्रश्न गरेपछि सार्वजनिक लेखा समितिमा दुई सांसदबीच चर्काचर्की भएको छ ।

राष्ट्रिय स्वतन्त्र पार्टीका सांसद असिम शाहले मञ्जु खाँणलाई भैरहवा विमानस्थल छानबिन उपसमितिको संयोजक बनाएकोमा प्रश्न उठाएका हुन् । भ्रष्टाचारको आरोपमा अनुसन्धानको दायरामा रहेको व्यक्तिलाई नै संयोजक बनाउनुको कारणबारे उनले प्रश्न उठाएका थिए ।

त्यसपछि लेखा समितिका सदस्य एवं सांसद मञ्जु खाँणले आपत्ति जनाइन् । उनले भनिन्, ‘तपाईंले के भन्नुभएको ? यसमा मेरो घोर आपत्ति छ । मलाई लेखा समितिले नै संयोजक तोकेको हो ।’

त्यसपछि सांसद शाहले ‘त्यसैले त तपाईंमाथि प्रश्न उठेको छ’ भनी प्रश्न गरेका थिए ।

खाँणले थपिन्, ‘मेरो कामकारबाहीमा प्रश्न गरेको भए ठिकै हुन्थ्यो । न म कुनै कारबाहीमा परेको छु । मिडियाले भनेको भरमा अपराधी बनाउने ? यो त अति नै भयो ।’

खाँणले थप भनिन्, ‘तपाईंको पार्टी सभापति कहाँ हुनुहुन्छ ? कुन केसमा हुनुहुन्छ ? सबैले सर्वसम्मतिमा म महिलालाई संयोजक बनाउँदा तपाईंलाई आपत्ति ?’

त्यसपछि उनले प्रश्न फिर्ता लिन सांसद शाहलाई आग्रह गरिन् । अरु सांसदहरूले संयम रहन आग्रह गरेपछि दुवैबीचको चर्काचर्की साम्य भएको थियो ।