देउवाबारे धनराज- ६/७ पटक पनि प्रधानमन्त्री बन्न सक्नुहुन्छ

News Summary

Generated by OK AI. Editorially reviewed.

सत्तारुढ दल नेपाली कांग्रेसका उपसभापति धनराज गुरुङले राजनीतिमा त्यागको मूल्य खोज्न नहुने बताए।
उहाँले भने, ‘राजनीतिमा आफ्नो लक्ष्य देश र जनताको लक्ष्य हुनुपर्छ।’
गुरुङले शेरबहादुर देउवा पाँच पटक प्रधानमन्त्री बन्न सफल भएको र अझै बन्नसक्ने बताएका छन्।

१० जेठ, काठमाडौं । सत्तारुढ दल नेपाली कांग्रेसका उपसभापति धनराज गुरुङले राजनीतिमा त्याग गरेको कुराको मूल्य खोज्न नहुने टिप्पणी गरेका छन् ।

शनिबार नेपाली कांग्रेस स्याङ्जाका पूर्वसभापति स्व. खगेन्द्रराज रेग्मीको प्रथम स्मृति सभालाई काठमाडौंमा सम्बोधन गर्दै उनले यस्तो बताएका हुन् ।

राजनीतिमा के पाएँ, के गुमाएँ भनेर औंला गनेर हिसाब गरेर बस्न नमिल्ने उल्लेख गरे । उनले राजनीतिमा आफ्नो गन्तव्य, आफ्नो लक्ष्य हुने भन्दै लक्ष्य र गन्तव्य देश र जनताको लक्ष्य हुनुपर्ने बताए ।

‘राजनीतिमा के पाएँ, के गुमाएँ भनेर औंला गनेर हिसाब गरेर बस्ने होइन । राजनीतिमा आफ्नो गन्तव्य, आफ्नो लक्ष्य प्राप्तिका लागि काम गर्ने हो । आफ्नो लक्ष्य भनेको देश र जनताको लक्ष्य हो,’ गुरुङले भने ।

पार्टीका सभापति शेरबहादुर देउवा राजनीतिक यात्राका क्रममा अटल खटेको परिणामतः पाँच पटक प्रधानमन्त्री बनिसकेको र अझै बन्नसक्ने उनको भनाइ छ ।

दुःख, अटल यात्राले सम्भावनाका ढोका खुल्दै जाने उनको भनाइ थियो ।

‘हाम्रो सभापतिज्यू, पूर्वप्रधानमन्त्रीज्यू, यो राजनीतिक यात्राको क्रममा अविरल ढंगबाट यात्र गर्दा उहाँले खप्नुभएको उत्तारचढाव व्याख्या गर्नुपर्दैन । त्यो उत्तारचढावलाई छिचोलेर अघि बढ्नुभएको छ,’ उनले भने, ‘रिस गरेर हुन्छ, पाँच पटक प्रधानमन्त्री बन्नुभयो । भनेर हुन्छ, अझै बन्नसक्नुहुन्छ नि उहाँ । ६ पटक, सात पटक नि बन्न सक्नुहुन्छ । त्यो यात्रा हो नि त । त्यो दुःख, अटल यात्राले ढोका खुल्दै जाने हो ।’