नागढुंगा–नौबिसे सडकखण्डमा बस पल्टियो, घण्टौंको ट्राफिक जामले यात्रु आजित

ट्राफिक जाममा परेका सवारी साधनहरुको ताँती

News Summary

Generated by OK AI. Editorially reviewed.

काठमाडौंको नागढुंगा–नौबिसे सडकखण्डको बस दुर्घटनामा तीन जना घाइते भएका छन्।
बस नालीमा खसेपछि बाटो जाम भएर सवारी साधनको लामो लाइन लागेको छ।
बसलाई हटाउन क्रेन पठाइएको छ र बाटो खुलाउन केही घण्टा लाग्ने अनुमान गरिएको छ।

१५ जेठ, काठमाडौं । काठमाडौंको नागढुंगा–नौबिसे सडकखण्डको नागमन्दिर नजिकै बस पल्टिँदा तीन जना घाइते भएका छन् । बस पल्टिएर बाटो जाम हुँदा सवारी साधनको लामो लाइन लागेको छ ।

दाङबाट काठमाडौं आउँदै गरेको लुम्बिनी प्रदेश ०२–००१ ख ०१७७ नम्बरको बस आज बिहान पौने तीन बजेतिर सडकको नालीमा खसेको थियो । उकालोमा ब्रेक नलागेर बस ब्याक भएको र नालीमा खसेको चालकलाई उद्धृत गर्दै प्रहरीले जनाएको छ ।

बस नालीमा खस्दा दुई जना यात्रुलाई सिसाले काटेर सामान्य घाइते भएका छन् । रोल्पाको परिवर्तन गाउँपालिकाकी २५ वर्षीया रोशनी घर्तीमगरको अवस्था भने गम्भीर छ । उनलाई उपचारका लागि कलंकीको शहीद मेमोरियल अस्पतालमा ल्याइएको छ ।

बसलाई हटाउन क्रेन पठाइएको छ । त्यसैले बाटो खुलेर सामान्य अवस्थामा फर्किन अझै केही घण्टा लाग्नसक्ने अनुमान छ ।

धादिङको थाक्रेमा पुलमा भ्वाङ परेपछि अस्तिदेखि नै सवारी साधनहरु सहज रुपमा सन्चालन हुन सकेका थिएनन् । आज बिहानपख नागमन्दिर नजिक बस दुर्घटना भएपछि झन् बढी सवारी जाम हुँदा यात्रुहरु हैरान भएका छन् ।