सेटिङबाट भिजिट भिसामा दुबई पुगेका युवा अनलाइन बेटिङ गिरोहको फन्दामा

२० जेठ, काठमाडौं । सेटिङ मिलाएर भिजिट भिसामा दुबई गएका नेपाली युवाहरू अनलाइन बेटिङ गिरोहको फन्दामा पर्ने गरेको खुलेको छ । काठमाडौं उपत्यका अपराध अनुसन्धान कार्यालयको टोलीले सोमबार राति छापा मारेर १७ जनालाई पक्राउ गरेपछि यो तथ्य बाहिर आएको हो ।

अपराध अनुसन्धान कार्यालयका एसपी तथा प्रवक्ता काजीकुमार आचार्यका अनुसार ललितपुरको नख्खुस्थित सनराइज अपार्टमेन्ट र धापाखेलको एक घरमा छापा मारेर ५ भारतीय र १२ नेपाली गरी १७ जनालाई पक्राउ गरिएको हो ।

उनीहरूमाथि अनुसन्धान गर्दा सबै जना भिजिट भिसामा दुबई गएको र त्यहाँ भारतीय अनलाइन बेटिङ गिरोहको सम्पर्कमा पुगेको देखिएको अपराध अनुसन्धान कार्यालयका एक अधिकारीले बताए ।

पक्राउ परेका सबैजसो नक्कली डकुमेन्ट बनाएर भिजिट भिसामा दुबई पुगेको देखिएको छ । भिजिट भिसामा जानका लागि चाहिने होटल बुकिङ, फर्कने हवाई टिकटदेखि बैंक ब्यालेन्ससम्म नक्कली बनाएर गिरोहले उनीहरूलाई भिजिट भिसामा दुबई पठाएको खुलेको हो ।

तर, अध्यागमनमा भने यस्ता कागजातबारे कुनै जाँच नै नगरी उनीहरूलाई सहजै भिजिट भिसामा दुबई जान दिएको पाइएको छ । ‘फर्जी कागजात बनाएर पेस गरेर गएको देखिन्छ । तर यसबारे अध्यागमनले कागजात हेर्ने बेलामा भने कुनै चासो नदेखाएकाले शंका गर्ने ठाउँ देखिन्छ,’ एक अनुसन्धान अधिकृत भन्छन् ।

त्यहाँ पुगेपछि भने आफूहरूलाई अलपत्र छाडिएको उनीहरूले बताएका छन् । ‘काम समेत पाइन्छ भनेर गिरोहले भिजिट भिसामा दुबई लगेको थियो । त्यहाँ पुगेपछि हामीहरूलाई अलपत्र छाडियो । एउटै कोठामा २५ जनासम्म युवा कोचिएर बस्यौं । काम खोज्दै जाने क्रममा गिरोहको फन्दामा परिएछ,’ हिरासतमा रहेका युवालाई उद्धृत गर्दै एक अनुसन्धान अधिकारीले अनलाइनखबरसँग भने ।

दुबई पुगेपछि पुनः दुई महिनाका लागि भिजिट भिसा थप गरिएको र पछि त्यहाँबाट भिसा एक्सटेन्ड गरिएको उनीहरूले बताएका छन् । भिसा एक्सटेन्ड गर्न देश छाड्नुपर्ने भएकाले त्यहाँबाट जोर्डन पुगेको र पुन: दुबई आएको उनीहरूले बताएका छन् ।

गिरोहको सम्पर्कमा पुगेपछि भने उनीहरूले भिजिट भिसालाई वर्किङमा कन्भर्ट गरिदिएको पक्राउ परेकाहरूले बताएका छन् । भारतीय गिरोहले भिजिट भिसामा दुबई पुगेकाहरूलाई आफ्नो सम्पर्कमा ल्याएपछि अनलाइन बेटिङको तालिम दिएर काममा लगाउने गरेको पाइएको छ ।

आईटी कम्पनीको भन्दै उनीहरूलाई काममा लगाइएको थियो । उनीहरूलाई मासिक ८० हजार रुपैयाँसम्म तलब दिने गरेको पाइएको छ । दुबईमा काम गरेपछि युवाहरूलाई सरुवा गर्दै नेपाल ल्याइएको थियो । नेपाल ल्याउने क्रममा सबै सेटिङ मिलाइसकेको भन्दै काठमाडौं ल्याइएको उनीहरूले बताएका छन् ।

भिजिट भिसामा को, कहिले गएका थिए दुबई ?

दुबई पुगेका नेपालीलाई सम्पर्क गरी अवैध अनलाइन ठगी धन्दामा लगाएको लामो समयपछि १२ नेपाली र ५ भारतीय सोमबार राति ललितपुरबाट पक्राउ परेका छन् ।

पक्राउ पर्नेहरूमा अछामको साँफेबगर नगरपालिका-९ का २९ वर्षीय डायमन्ड कुँवर, अछामकै चौरपाटी गाउँपालिका-७ का २१ वर्षीय मनोज बोगटी, कञ्चनपुरको कृष्णनगर नगरपालिका-३ का ३० वर्षीय राजेन्द्रबहादुर महत, कैलालीको गौरीगंगा नगरपालिका-६ का २१ वर्षीय अरविनकुमार खड्का, दाङको लमही नगरपालिका-१ का २४ वर्षीय विष्णुकुमार राउत, डोटीको पूर्वीचौकी गाउँपालिका-४ का ३० वर्षीय तिलक खड्का, पूर्वी नवलपरासीको गैंडाकोट नगरपालिका-१२ का २६ वर्षीय जोर्डन भनिने जीतबहादुर महतो, डोटीको पूर्वीचौकी गाउँपालिका-४ का २३ वर्षीय सुवास खड्का, अछामको साँफेबगर नगरपालिका-७ का २१ वर्षीय विकास थापा, डोटीको पूर्वीचौकी गाउँपालिका-४ का २३ वर्षीय हर्कबहादुर खड्का र रुपन्देहीको तिलोत्तमा नगरपालिका-४ का २६ वर्षीय पूर्णबहादुर दलार्मी मगर छन् ।

यो पनि पढ्नुहोस

भिजिट भिसाका नाममा मानव तस्करी, शंकामा गृह प्रशासन

त्यसैगरी, भारत बिहारका २० वर्षीय ऋषभ राज, बिहारकै २६ वर्षीय दीपककुमार सिंह, बिहारकै २५ वर्षीय अंकित कुमार सिंह, बिहारकै २५ वर्षीय धीरजकुमार सिंह, दिल्लीका २५ वर्षीय मोहितकुमार सिंह छन् ।

उनीहरूबाट बेटिङ खेलाउन प्रयोग भएको १४ वटा ल्यापटप र ६० वटा मोबाइल बरामद गरिएको आचार्यले बताए ।

पक्राउ परेकामध्ये कुँवर सन् २०२२ मा भिजिट भिसामा गएका थिए । सामाखुसीमा रहेको एक म्यानपावरले डेढ लाख रुपैयाँ लिएर भिजिट भिसामा आफूलाई दुबई लगेको कुँवरले बताएको एक अनुसन्धान अधिकृतले बताए ।

डेढ लाख दिएपछि भिजिट भिसाका लागि चाहिने बैंक ब्यालेन्सदेखि होटल बुकिङ र फर्कनेसम्मको टिकट नक्कली बनाएको अनुसन्धानबाट खुलेको छ । यस विषयमा प्रहरीले विस्तृत अनुसन्धान गर्न बाँकी नै छ ।

भिजिट भिसामा जानका लागि सबै सेटिङ मिलाउनुपर्छ भन्दै एकजनाबाट साढे २ लाख रुपैयाँसम्म लिएको पक्राउ परेकाहरूले बताएको एक अनुसन्धान अधिकृतले बताउँछन् ।

अछामकै बोगटी पनि २५ नोभेम्बर २०२४ मा भिजिट भिसामा दुबई पुगेको खुलेको छ । त्यहाँ पुगेपछि उनी पनि भारतीय गिरोहको सम्पर्कमा पुगेका थिए ।

महत पनि सन् २०२३ मा भिजिट भिसामा दुबई गएका व्यक्ति हुन् । अरविन खड्का भने दुबई नगएका व्यक्ति हुन् । राउत २०२४ र २०२५ मा भिजिट भिसामा दुबई पुगेका थिए ।

डोटीका ठक्कर कुँवर २०२४ मा, डोटीकै देवी कुँवर २०२४-२०२५ मा दुबई गएको पाइएको छ । डोटीका तिलक खड्का पनि २०१९ र २०२५ मा भिजिट भिसामा दुबई पुगेका थिए ।

गैंडाकोटका महतो २६ जनवरी २०२५ मा भिजिट भिसामा दुबई पुगेको पाइएको छ । डोटीका हर्कबहादुर खड्का पनि २६ जनवरी २०२५ मा भिजिट भिसामा दुबई गएको देखिएको छ । रुपन्देहीका दर्लामी मगर २०२४-२०२५ मा भिजिट भिसामा दुबई गएको देखिएको छ ।

यो समूहले लामो समय दुबईमा काम गरेर ५ महिनाअघि मात्रै सरुवा भएर आएको पाइएको छ । केही समय यहाँ काम गरेपछि श्रीलंका पठाउने तयारीमा रहेको प्रहरीले बताएको छ ।

मासिक सवा २ लाख भाडा तिरेर बेटिङ धन्दा

भिजिट भिसामा दुबई पुगेर भारतीय अनलाइन बेटिङ गिरोहको सम्पर्कमा पुगेका नेपाली युवालाई मासिक ८० हजार रुपैयाँसम्म तलब दिएर अवैध धन्दामा काम लगाउने गरेको पाइएको छ ।

त्यसका लागि भारतीय गिरोहले मासिक सवा २ लाख तिरेर घर भाडामा लिएको पाइएको छ । धापाखेलको एक घर मासिक १ लाख २५ हजार रुपैयाँ तिरेर भाडामा लिएको पाइएको छ ।

सनराइज अपार्टमेन्टको एक फ्ल्याटमा भने मासिक ५५ हजार रुपैयाँ भाडा तिर्ने गरिएको पक्राउ परेकाहरूले बताएका छन् ।

प्रहरीले धापाखेलको घरबाट १५ जनालाई र अपार्टमेन्टबाट २ जनालाई पक्राउ गरेको छ । यो गिरोहका तीन भारतीय नागरिक भने फरार छन् । पक्राउ परेकाहरू सबै कामदार हुन् । यसका मुख्य योजनाकार पनि भारतीय नागरिक नै रहेको प्रहरीले बताएको छ ।

उनीहरूले ७११ ब्याट डट क्लब र युनिकर्न ३६५ बेटिङ साइटमार्फत बेटिङ खेलाउने गरेको प्रहरीले बताएको छ । पछिल्लो ५ महिना मात्रै यो समूहले नेपाली ८० करोड रुपैयाँभन्दा बढीको बेटिङ खेलाएको अनुसन्धानबाट खुलेको छ ।

यो रकम भने भारतीय बैंकका खातमा कारोबार हुने गरेको प्रहरीले बताएको छ । जसका कारण बेटिङको रकम सोझै भारत पुग्ने गरेको प्रहरी अधिकारीहरू बताउँछन् ।