शिक्षाले गृह मन्त्रालयलाई भन्यो– त्रिवि उपकुलपतिको कार्यालयमा तोडफोड गर्नेलाई कारबाही गर्नू

News Summary

Generated by OK AI. Editorially reviewed.

शिक्षा मन्त्रालयले त्रिभुवन विश्वविद्यालयको उपकुलपति कार्यालयमा तोडफोड गरेकालाई कारबाही गर्न गृह प्रशासनलाई आग्रह गर्यो।
मन्त्रालयले दोषीलाई कानूनी कारबाही गर्न गम्भीर अनुसन्धान गरिरहेको जनाएको छ।
गत १४ जेठमा विद्यार्थी नेताहरूले विश्वविद्यालयको कार्यालयमा तोडफोड र तालाबन्दी गरेका थिए।

२१ जेठ, काठमाडौं । शिक्षा, विज्ञान तथा प्रविधि मन्त्रालयले त्रिभुवन विश्वविद्यालयको उपकुलपति कार्यालयमा तोडफोड गर्नेलाई कारबाही गर्न गृह प्रशासनलाई आग्रह गरेको छ ।

‘त्रिभुवन विश्वविद्यालयको उपकुलपतिको कार्यालयमा एक समूहबाट तोडफोड भएको तथा अन्य पदाधिकारीको कार्यालयमा तालाबन्दी गरिएको घटनाप्रति यस मन्त्रालयको गम्भीर ध्यानाकर्षण भएको छ,’ मन्त्रालयले जारी गरेको विज्ञप्तिमा भनिएको छ ।

शिक्षा मन्त्री रघुजी पन्तले दोषीलाई कारबाही गर्न गृह प्रशासनलाई अनुरोध गरेको मन्त्रालयले जनाएको छ । ‘अनुशासनहीन र गैरकानूनी कार्यमा संलग्न जोसुकै भएपनि गम्भीर अनुसन्धानबाट पहिचान गरी तिनलाई कानूनी कारबाहीको दायरामा ल्याउन गृह प्रशासनको उच्च तहसँग परामर्श गर्दै सम्बन्धित पदाधिकारीलाई आवश्यक अनुरोध गर्नु भएको छ,’ विज्ञप्तिमा भनिएको छ ।

मन्त्रालयले तोडफोडको घटनाको अनुसन्धान गरिरहेको जनाएको छ । ‘त्रिभुवन विश्वविद्यालय ऐन, २०४९ को दफा १७ (३) अनुसार सहकुलपतिका हैसियतबाट माननीय मन्त्रीज्यूले उक्त घटनाका सम्बन्धमा सुक्ष्म अध्ययन गरिरहनु भएको छ,’ विज्ञप्तिमा भनिएको छ ।

गत १४ जेठमा नेविसंघका विद्यार्थी नेताहरूले उपकुलपति खड्ग केसीको कार्यकक्षमा तोडफोड र रेक्टर कार्यालयमा ताला लगाएका थिए ।