एमाले निकट अनेरास्ववियुको महाधिवेशन आज, सर्वसम्मत नेतृत्व चुन्ने प्रयास जारी

News Summary

Generated by OK AI. Editorially reviewed.

नेकपा एमाले निकट अनेरास्ववियुको २४ औं महाधिवेशन काठमाडौंमा सुरु हुँदैछ।
महाधिवेशनले संगठनको नीति तय गर्न र नयाँ नेतृत्व चयन गर्नुपर्नेछ, जसमा ३२ वर्षे उमेर हद लागू हुनेछ।
उमेर हद लागू भएपछि अध्यक्ष पदका दाबेदार १५ जना प्रतिस्पर्धाबाट अलग हुने र सचिव तहमा नयाँ नेतृत्व आउने सम्भावना छ।

२५ जेठ, काठमाडौं । नेकपा एमाले निकट अनेरास्ववियुको २४ औं महाधिवेशन काठमाडौंमा सुरु हुँदै छ । महाधिवेशनको उदघाटन आज दिउँसो प्रधानमन्त्री एवम् नेकपा एमालेका अध्यक्ष केपी शर्मा ओलीले त्रिभुवन विश्वविद्यालय परिसरमा गर्ने छन् ।

महाधिवेशनले संगठनको नीति तथा कार्यक्रम तय गर्नुका साथै नयाँ नेतृत्व समेत चयन गर्ने छ । नेतृत्वमा पहिलोपटक ३२ वर्षे उमेर हद लागू हुने छ ।

उमेर हद लागू हुने भएपछि नेतृत्वको दाबेदार मानिएका १५ जना पदाधिकारी प्रतिस्पर्धाबाट अलग हुनेछन् भने नेतृत्व गर्ने अवसर सचिव तहमा आउने छ ।

११ जेठमा बसेको एमाले सचिवालय बैठकले माओवादी केन्द्र निकट अखिल क्रान्तिकारीको जस्तै अनेरास्ववियुमा ३२ वर्षे उमेर हद लागू गर्ने निर्णय गरेको थियो ।

यो निर्णयसँगै अध्यक्षका दाबेदार महासचिव नरेश रोकाया, उपाध्यक्षहरु नारायण घर्ती, गोविन्द गिरी, मर्यादा विष्ट, धर्म गिरी लगायत प्रतिस्पर्धाबाट अलग हुनेछन् ।

यससँगै सचिव पदमा रहेकाहरु दीपक धामी, सुजन कडरिया, अञ्जना शिवाकोटी, आरती भट्टराई, प्रकाश पौडेल लगायत दाबेदार छन् । उनीहरु सबैले अध्यक्षमा प्रतिस्पर्धा गर्ने भनेर प्रचार गरिरहेका छन् ।

अध्यक्ष केपी शर्मा ओलीले दाबेदारको संख्या घटाउन र सकेसम्म सहमतिमा नेतृत्व चयन गर्न निर्देशन दिएकाले जनसंगठन समन्वय संयन्त्रले सहमतिको प्रयास जारी राखेको छ । तर आइतबार महाधिवेशन उदघाटनको दिनसम्म सहमति नजुटेको एक पदाधिकारीले बताए ।