हलमा लाग्यो ‘महाभोज’, ओपनिङ अकुपेन्सी कस्तो छ ?

काठमाडौं । शुक्रबारदेखि नेपालमा ‘महाभोज’सहित ३ फिल्म प्रदर्शनमा आएका छन् । नेपालकोे ‘महाभोज’ र हलिउडका दुई फिल्म ‘हाउ टु ट्रेन योर ड्रागन’ र ‘ब्यालेरिना’ प्रदर्शनमा आए ।

‘महाभोज’ देशब्यापी ११० भन्दा धेरै शोसहित प्रदर्शनमा आएको छ । यो फिल्ममा दयाहाङ राई, आर्यन सिग्देल, खगेन्द्र लामिछाने, अञ्जना बराइली, मलिका महत र गौमाया गुरुङको शीर्ष भूमिका छ ।

काठमाडौंमा प्रिमियर भइसकेको ’महाभोज’को टोलीले हालै पोखरा र बुटवलमा पनि विशेष शो आयोजना गर्‍यो । यसक्रममा बिहीबार एकै दिन विराटनगर र धरानमा पनि प्रिमियर शो सम्पन्न भए ।

‘महाभोज’ सोसल ड्रामा जनरामा आधारित छ । सहकारी संस्थामा वचत गरिएको रकम अपचलन हुँदा वचतकर्ताको सामाजिक र आर्थिक जीवनमा ल्याउने उतारचढावको कथा यसमा छ ।

फिल्मले मोफसलका प्रिमियरमा सकारात्मक प्रतिक्रिया प्राप्त गरेको निर्माताले जनाएका छन् । काठमाडौं उपत्यका बाहिरका प्रिमियर शोमा कलाकार आर्यन सिग्देल, खगेन्द्र लामिछाने, अञ्जना बराइली, मलिका महतका साथै निर्देशक दिनेश राउत पनि उपस्थित थिए ।

प्रिमियर शोमा केही सहकारी पीडित पनि सहभागी थिए । फिल्मलाई सबैले हेरेर राज्यलाई व्यापक दबाब दिनुपर्ने प्रतिक्रिया उनीहरूको छ । फिल्मले यथार्थ चित्रण गरेको र न्यायका लागि आवाज उठाउन प्रेरित गर्ने उनले बताए ।

ओपनिङ अकुपेन्सी कस्तो छ ?

शुक्रबार बिहानको प्रारम्भिक अकुपेन्सी न्यून छ । बलियो ‘वर्ड अफ माउथ’को मद्दतमा फिल्मले अकुपेन्सीलाई वृद्धि गर्नुपर्ने चुनौती देखिन्छ । सोसल ड्रामा फिल्मको मुख्य चुनौती भनेकै ‘सकारात्मक प्रतिक्रिया’ बटुलेर अकुपेन्सी बढाउनु हो । के ‘महाभोज’ले दर्शकलाई हलसम्म तान्न सक्ला ? यसको नतिजा पहिलो सप्तान्तसम्म स्पष्टरुपमा देखिनेछ ।