नाराबाजीबीच संसद् कार्यसूचीमा प्रवेश गरेपछि एकीकृत समाजवादीको नियमापत्ति

News Summary

Generated by OK AI. Editorially reviewed.

नेकपा एकीकृत समाजवादीले संसद् कार्यसूचीमा प्रवेश गरेपछि नियमापत्ति गरेको छ।
उपाध्यक्ष राजेन्द्र पाण्डेले सभामुखको ध्यानाकर्षण गर्दै सभा चलाउने तरिका परिवर्तनको माग गरे।
प्रतिनिधि सभामा नाराबाजी र विरोध प्रदर्शनका कारण बैठक प्रभावित भएको थियो।

१ असार, काठमाडौं । नाराबाजीबीच संसद् कार्यसूचीमा प्रवेश गरेपछि नेकपा एकीकृत समाजवादीले नियमापत्ति गरेको छ ।

एकीकृत समाजवादीका वरिष्ठ उपाध्यक्ष राजेन्द्र पाण्डेले यो विषयमा सभामुखको ध्यानाकर्षण गरेका हुन् ।

प्रतिनिधि सभामा राष्ट्रिय स्वतन्त्र पार्टी (रास्वपा)ले वेल घेराउ र नाराबाजी गरिरहेको छ । राष्ट्रिय प्रजातन्त्र पार्टी (राप्रपा)ले आसनमै उभिएर विरोध जनाइरहेको छ ।

यस्तो अवस्थामा प्रतिनिधि सभामा सभामुख देवराज घिमिरेले आकस्मिक समय चलाए । त्यसपछि राष्ट्रिय सभाबाट पारित भएर पुगेको विधेयकको सन्देश सुनाए ।

आगामी आर्थिक वर्षको बजेटमाथि सामान्य छलफल गरियोस् भन्ने प्रस्ताव उपप्रधान तथा अर्थमन्त्री विष्णु पौडेललाई प्रस्तुत गर्न समय दिए ।

अर्थमन्त्री पौडेलले रोष्ट्रममा पुगेर आफ्ना कुरा राख्न थालेपछि एकीकृत समाजवादीका वरिष्ठ उपाध्यक्ष पाण्डेले सभामुखको ध्यानाकर्षण गरेका हुन् ।

‘सभामुखज्यू, रोष्ट्रममा अर्थमन्त्रीज्यू महत्त्वपूर्ण कुरा सुनाइराख्नुभएको छ । तर, प्रतिपक्षमा रहेकामध्ये एउटा दल नाराबाजीमा छ । यो नाराबाजीले मन्त्रीले भनेका कुरा हामी सुनिरहेका छैनौं,’ पाण्डेले भने ।

सभा कसरी चलाउने हो त्यसबारे छलफल आवश्यक रहेको उनले बताए । ‘कसरी सभा चलाउने हो ? यो सभा चलाउने अहिलेको यो तरिका भएन सभामुख महोदय,’ पाण्डेले थपे, ‘यो बैठक स्थगित गरेर, सहमति गरेर र एउटा टुंगोमा पुगेर मात्रै अगाडि बढाइयोस् ।’