महाप्रसादको हस्ताक्षर भएका ३४ करोड थान १० को नयाँ नोट बजारमा

News Summary

Generated by OK AI. Editorially reviewed.

नेपाल राष्ट्र बैंकले १० रुपैयाँ दरका नयाँ नोट सोमबारदेखि बजारमा ल्याएको छ।
नयाँ नोटमा सगरमाथाको चित्र, लालीगुराँसको पानी छाप र गभर्नर महाप्रसाद अधिकारीको हस्ताक्षर समावेश छ।
नोटको सिरिज नम्बर ‘वि.सं. २०८१’ र ‘२०२४ ए.डि.’ लेखिएको छ।

२ असार, काठमाडौं । नेपाल राष्ट्र बैंकले १० रुपैयाँ दरका नयाँ नोट सोमबारदेखि बजार ल्याएको छ ।

केन्द्रीय बैंकले निवर्तमान गभर्नर महाप्रसाद अधिकारीको हस्ताक्षर भएका ३ अर्ब ४० करोड रुपैयाँ बराबरका १० को नयाँ नोट प्रयोगमा ल्याएको हो ।

राष्ट्र बैंकले १० रुपैयाँ दरका ३४ करोड थान बराबर नोट चलनचल्तीमा ल्याएको हो । केन्द्रीय बैंकले साविककै आकार तथा रङमा संकेत नम्बर ०००००१ देखि ९९९९९९ सम्म नोट चलनचल्तीमा ल्याएको हो । केन्द्रीय बैंकले ०००००१ देखि ९९९९९९ सम्म संकेत नम्बर भएका भने पनि प्रयोगमा भने ८००००० सम्ममात्र आएको जनाएको छ ।

१० को नयाँ नोटको अग्र भागमा बायाँतर्फ सगरमाथाको चित्र छ भने दायाँतर्फ लालीगुराँसको पानी छाप छ । नोटमा गभर्नरको हस्ताक्षर रहने स्थानमा तत्कालीन गभर्नर महाप्रसाद अधिकारीको हस्ताक्षर छ । नोटको तल्लो भागको बोर्डरमा नोटको सिरिज नम्बर नेपालीमा ‘वि.सं. २०८१’ लेखिएको छ ।

नोटको पछिल्लो भागको मध्य माथिल्लो खण्डमा अंग्रेजीमा नेपाल राष्ट्र बैंक लेखिएको छ । नोटको मध्यभागमा कृष्णसारको चित्र र तल्लो भागको बोर्डरमा अंग्रेजीमा रुपिज टेन लेखिएको छ । नोटको तल्लो भागको बोर्डरमा सिरिज नम्बर अंग्रेजीमा ‘२०२४ ए.डि.’ लेखिएको छ ।