२०८२ असार ६ गते २१:२१ 
News Summary
Generated by OK AI. Editorially reviewed.- स्कटल्याण्डले १९३ रन बनाउँदै नेपाललाई १९४ रनको लक्ष्य दिएको छ।
- जर्ज मन्सेले ७८ रन बनाएर महत्वपूर्ण भूमिका खेले।
- नेपालले दुई खेल जित्दा स्कटल्याण्डले एक खेल जितेको छ।
६ असार, काठमाडौं । जर्ज मन्सेको आक्रामक अर्धशतकमा त्रिदेशीय टी-२०आई शृंखलाको अन्तिम खेलमा स्कटल्याण्डले नेपाललाई बलियो लक्ष्य दिएको छ ।
टस जितेर पहिले ब्याटिङ गरेको स्कटल्याण्डले २० ओभरमा ५ विकेट गुमाएर १९३ रन बनाउँदै नेपाललाई १९४ रनको लक्ष्य दिएको हो ।
ओपनर जर्ज मन्सेले ३९ बलमा ५ चौका र ६ छक्काको मद्दतले ७८ रन बनाए । त्यस्तै ब्रान्डन म्याकमुलेनले ४२ रन बनाए । माइकल लिस्क २६ तथा म्याथ्यु क्रस १७ रनमा अविजित रहे ।
मन्से र म्याकमुलेनले मिलेर दोस्रो विकेटका लागि १०० रनको साझेदारी गरेका थिए । ३४-१ बाट १३४-२ को अवस्थामा रहेको भएपनि नेपालले त्यसपछि ११ रनको अन्तरमा ३ विकेट लिएपछि स्कटल्याण्ड १४५-५ को अवस्थामा पुगेको थियो ।
त्यहाँबाट लिस्क र क्रसले ४८ रनको अविजित साझेदारी गरे ।
नेपालका कुशल भुर्तेलले २ ओभरमा २० रन दिएर २ विकेट लिए । सन्दीप लामिछाने, ललित राजवंशी र रुपेश सिंहले १-१ विकेट लिए ।
यस शृंखलामा हालसम्म नेपालले २ खेल जित्दा स्कटल्याण्डले एक खेल मात्र जितेको छ । पहिलो खेलमा नेदरल्याण्ड्सलाई हराएपछि स्कटल्याण्ड नेपालसँग र नेदरल्याण्ड्ससँग पराजित भएको थियो ।
नेपालले भने ठीक विपरित पहिलो खेलमा हार बेहोरेपछि दुई जित निकालेको छ । नेदरल्याण्ड्ससँग सुपर ओभरमा पराजित भएको नेपालले स्कटल्याण्डलाई हराउँदा बिहीबार नेदरल्याण्ड्सलाई हराएको छ ।
प्रतिक्रिया 4