२०८२ असार २५ गते १८:३३ 
News Summary
Generated by OK AI. Editorially reviewed.- नेपाल कराते महासंघले खेललाई सरकारद्वारा बेवास्ता गरेको गुनासो गरेको छ।
- अध्यक्ष युवराज लामाले अन्तर्राष्ट्रिय सफलताका बाबजुद सम्मान नपाएको आरोप लगाए।
- महासंघले सबै खेललाई समान व्यवहार गर्न सरकारको ध्यानाकर्षण गराएको छ।
२५ असार, काठमाडौं । नेपाल कराते महासंघले करातेजस्तो अन्तर्राष्ट्रिय स्तरमा सफलता हासिल गरिरहेको खेललाई सरकार र नीतिनिर्माताहरूले बेवास्ता गरेको गुनासो गरेको छ।
महासंघका अध्यक्ष तथा दक्षिण एशियाली कराते महासंघका महासचिव युवराज लामाले सरकारले केही सीमित खेललाई मात्र प्राथमिकता दिँदै बाँकी खेलप्रति विभेदपूर्ण व्यवहार गरिरहेको आरोप लगाएका हुन्।
‘अन्तर्राष्ट्रिय प्रतियोगितामा उत्कृष्ट प्रदर्शन गर्दा पनि कराते खेलाडीहरूलाई न त शुभकामना दिइन्छ, न त सम्मान वा पुरस्कार’ उनले जारी गरेको विज्ञप्तिमा भनिएको छ। अर्कोतर्फ, केही खेलमा सामान्य उपलब्धिमै लाखौं रुपैयाँ पुरस्कार घोषणा हुने गरेको उनले बताए।
यस्तै, हालै सम्पन्न नवौं दक्षिण एसियाली कराते च्याम्पियनसिपमा नेपालले २१ स्वर्ण, ९ रजत र २० कास्य पदकसहित कुल ५० पदक जितेर ऐतिहासिक सफलता हासिल गरे पनि सरकार वा खेलकुद निकायबाट कुनै आधिकारिक सम्मान वा पुरस्कारको घोषणा नभएको महासंघको भनाइ छ।
महासंघले ‘सबै खेल समान’ भन्ने सिद्धान्त व्यवहारमा लागू गर्न सरकारको ध्यानाकर्षण गराएको छ। उनीहरूले करातेजस्ता ओलम्पिक मान्यताप्राप्त खेललाई पनि बराबरी व्यवहार गर्न आग्रह गरेका छन् ।
यस्तै करातेका मुख्य प्रशिक्षक कुशल श्रेष्ठले पनि सामाजिक सञ्जालमा पछिल्लँ दुई वर्षको उपलब्धीहरु पोष्ट गर्दै प्रधानमन्त्री र राज्यबाट करातेलाई किन उपेक्षा भनेर प्रश्न राखेका छन् ।
प्रतिक्रिया 4