‘सुपरम्यान’ बन्यो २०२५ मा उच्च ओपनिङ गर्ने हलिउड सुपरहिरो फिल्म

News Summary

Generated by OK AI. Editorially reviewed.

जेम्स गन निर्देशित डीसी ब्रम्हाण्डको फिल्म ‘सुपरम्यान’ले पहिलो सप्ताहन्तमा विश्व बक्सअफिसमा २१० देखि २१५ मिलियन डलर कमाउने प्रक्षेपण छ।
उत्तर अमेरिकामा यसले ५६.५ मिलियन डलर ओपनिङ गरेको छ, जुन सन् २०२५ को दोस्रो ठूलो ओपनिङ हो।
निर्देशक गनले ‘गार्जियन्स अफ द ग्यालेक्सी’ निर्देशन गरिसकेका छन् र डेभिड कर्नस्वेटले सुपरहिरो पात्र निभाएका छन्।

काठमाडौं । जेम्स गन निर्देशित डीसी ब्रम्हाण्डको हलिउड सुपरहिरो फिल्म ‘सुपरम्यान’को पछिल्लो श्रृंखलाले पहिलो सप्ताहन्त विश्व बक्सअफिसमा आक्रामक ओपनिङ गर्ने देखिएको छ ।

यो फिल्मले शुक्रबारदेखि आइतबारसम्म विश्वभर २१० देखि २१५ मिलियन डलर ओपनिङ गर्ने प्रक्षेपण छ । जसमध्ये ११५-१२२ मिलियन डलर उत्तर अमेरिका र ९०-९५ मिलियन डलर अन्तर्राष्ट्रिय बजारमा कमाइ हुने अनुमान छ ।

शुक्रबार मात्रै उत्तर अमेरिकामा यसले ५६.५ मिलियन डलर ओपनिङ गरेको छ । यो ओपनिङ सन् २०२५ को दोस्रो ठूलो ओपनिङ हो । यसैवर्ष रिलिज भएको ‘अ माइनक्राफ्ट मूभी’ले ५७.११ मिलियन डलरको ओपनिङ गरेको थियो ।

‘सुपरम्यान’को यो ओपनिङ सन् २०२४ मा रिलिज भएको ‘डेडपुल एन्ड वुल्भरिन’ पछिको सबैभन्दा ठूलो सुपरहिरो ओपनिङ हो । सन् २०१७ मा रिलिज भएको डीसीको फिल्म ‘वन्डर वुमन’ पछि डीसी स्टुडियोको बलियो ओपनिङ हो ।

निर्विवाद के हो भने, ‘सुपरम्यान’ यसवर्षको अहिलेसम्म सबैभन्दा उच्च ओपनिङ गर्ने सुपरहिरो फिल्म बनेको छ । यो फिल्मले व्यवसायिक मात्र होइन, समीक्षकबाट समेत उत्कृष्ट प्रतिक्रिया प्राप्त गरेको छ ।

निर्देशक गनले यसअघि ‘गार्जियन्स अफ द ग्यालेक्सी’बाट ३ संस्करणलाई निर्देशन गरिसकेका छन् । यस फिल्ममा डेभिड कर्नस्वेटले सुपरहिरो पात्रको रुपमा अभिनय गरेका छन् ।

यो फिल्म अहिले नेपालमा समेत प्रदर्शन भैरहेको छ ।