कांग्रेसमा कोतपर्व जस्तै अनुशासन पर्व चल्यो : गगन थापा

३० असार, काठमाडौं । नेपाली कांग्रेसका महामन्त्री गगन थापाले पार्टीभित्र केही नेताहरूलाई गरिएको अनुशासनको कारबाहीलाई कोत पर्वजस्तै अनुशासन पर्वको संज्ञा दिएका छन् ।

कांग्रेसको बुद्धिजीवी विभागले काठमाडौंमा गरेको कार्यक्रममा सोमबार बोल्दै महामन्त्री थापाले पार्टीभित्र गरिएको अनुशासनको कारबाही समय, पार्टीको परम्परा र कानुन-विधानका हिसाबले पनि गलत भएको बताएका हुन् ।

‘म त यो पार्टीको बैठक सकिएपछि म पाँच सात दिनलाई बाहिर गएँ, फर्केर आइसकेपछि अब सबै भातृ संस्थाको अधिवेशन गराउने, विभागहरुलाई पनि बोलाएर हामीले एउटा कार्यक्रम गर्ने भनेर सोचिरहेका छौं’ उनले भने, ‘तर यो बीचमा एउटा नमिठो घटना पार्टीभित्र भयो।’

उनले थपे, ‘हामी अहिले चौतर्फी घेराबन्दीमा छौं, यो बेलामा पार्टीभित्र जसरी एउटा कोतपर्व जस्तै अनुशासन पर्व चल्यो, न यो समयको हिसाबले ठीक भयो, न यो पार्टी परम्परा, न पार्टीको कानुन र पार्टीको विधानको हिसाबले ठीक छ।’

थापाले अनुशासनको कारबाहीले पार्टीलाई थप कमजोर बनाउने टिप्पणी गरे ।

अनुशासनहीनहरूलाई कारबाही गर्ने यो तरिकाले पार्टीभित्र भइरहेका सत्प्रयासहरू कमजोर बनाउने उनले बताए । ‘पार्टीका दुई महामन्त्री सबैतिर समस्याको घाउ मिलाउँदै, गाली खाँदै हिँड्ने अनि पार्टीमा जिम्मा लिएकोले कहिले एउटाले एक ठाउँमा गल्ती गर्दिएको छ, कहिले आगो लगाइदिएर यसलाई सम्हाल्न गाह्रो हुन्छ,’ उनले भने ।

पार्टीभित्रको एकता कायम गर्ने कुरामा नेतृत्वले ध्यान पुर्‍याउने पर्ने महामन्त्री थापाले बताए ।