२०८२ असार ३२ गते १७:०५ 
News Summary
Generated by OK AI. Editorially reviewed.- जोरा स्पोर्ट्स इन्टरटेन्मेन्ट प्रालिका सञ्चालक आमिर अख्तरले नेपाल प्रिमियर लिगको ट्रेडमार्क आफ्नो भएको दाबी गर्दै उच्च अदालत जाने बताएका छन्।
- उद्योग विभागले नेपाल क्रिकेट संघलाई एनपीएलको ट्रेडमार्क दिएको निर्णय गरेपछि अख्तरले अदालत जाने योजना बनाएका हुन्।
- अख्तरले कम्पनी दर्ता, बैंक खाता र कर भुक्तानी आफूसँग भएको उल्लेख गर्दै क्यानले ट्रेडमार्क पाउन नहुने बताए।
३२ असार, काठमाडौं । जोरा स्पोर्ट्स इन्टरटेन्मेन्ट प्रालिका सञ्चालक तथा पूर्वक्रिकेटर आमिर अख्तरले नेपाल प्रिमियर लिग (एनपीएल)को ट्रेडमार्कसमबन्धी दाबी लिएर अदालत जाने बताएका छन् ।
उद्योग विभागले नेपाल क्रिकेट संघ (क्यान)लाई एनपीएलको ट्रेडमार्क दिएपछि एनपीएलको ट्रेडमार्क र लोगो आफुहरूको भएको मागसहित उद्योग विभाग पुगेका अख्तरको विरुद्धमा निर्णय गर्दैकेही दिनअघि विभागले एनपीएलको स्वामित्व क्यानसँगै रहने जानकारी गराएको थियो ।
यसबारेमा कुरा गर्दै अख्तरले एनपीएल आफ्नो भएको र यसको दाबी लिएर अब अदालत जाने बताएका हुन् । ‘मैले एनपीएलको ट्रेडमार्क क्यानलाई कसरी दिएको भनेर उद्योग विभागमा च्यालेन्ज लिएर गएको थिएँ, उहाँहरूले लोगो र ट्रेडमार्क क्यानसँगै रहने भनेर फेरि भन्नुभएको छ’ उनले अनलाइनखबरसँग भने, ‘अब हामी हाइ कोर्ट (उच्च अदालत) मा जान्छौं, यो सबै हाम्रै स्वामित्वमा छ, हुनुपर्छ।’
‘कम्पनीमा पनि मेरो दर्ता छ, पान नम्बर, भ्याट नम्बर, एनपीएलको बैंक अकाउन्ट पनि मेरै नाममा छ, ट्रेडमार्कको कर पनि मैले नै तिरेको छु, त्यसो हुँदा क्यानले कसरी पाउन सक्छ’ उनले अगाडि भने ।
एनपीएलको काम १० वर्षअघि आफुले नै गरेको र यो ट्रेडमार्क आफ्नै हुनुपर्ने उनको धारणा छ ।
यता क्यानका प्रवक्ता छुम्बी लामा भने क्यानले एनपीएलको ट्रेडमार्क पाउने कुरा राम्रो भएको बताउँछन् । ‘कुनै पनि देशको क्रिकेट बोर्डले फ्रेन्चाइज लिग सञ्चालन गर्ने हो, त्यसकारण यसमा कुनै विवाद गर्न जरुरी नै छैन’ लामाले भने, ‘बरु आमिरजीले एनपीएल आयोजना गर्ने कुरामा सहयोग नै गर्नुपर्छ।’
यसअघि जोरा स्पोर्ट्स इन्टरटेन्मेन्ट प्रालिले आफूसँग भएको सम्झौताविपरीत नेपाल प्रिमियर लिग सञ्चालन गरेको भन्दै मुद्दा पनि दायर गरेको थियो ।
प्रतिक्रिया 4