माओवादीमा अब नेतृत्वविरूद्ध बोल्न नपाइने

News Summary

Generated by OK AI. Editorially reviewed.

नेकपा माओवादी केन्द्रले नेताहरूलाई पार्टी नेतृत्वका विरूद्ध अभिव्यक्ति नदिन सचेत गराएको छ।
स्थायी समिति बैठकले नेतृत्वका विरूद्ध जथाभावी अभिव्यक्ति दिने क्रम बढेपछि सचेत गराउने निर्णय गरेको छ।
पार्टीभित्रै छलफल गर्नुपर्ने र बाहिर नेतृत्वका विरूद्ध अभिव्यक्ति दिन नहुने निष्कर्ष बैठकले निकालेको छ।

१९ साउन, काठमाडाैं । नेकपा माओवादी केन्द्रले नेताहरूलाई पार्टी नेतृत्वविरूद्ध अभिव्यक्ति नदिन सचेत गराएको छ ।

शुक्रबार सुरु भइ सोमबार सकिएको पार्टी स्थायी समिति बैठकले नेतृत्वविरूद्ध अभिव्यक्ति नदिन पार्टी नेता कार्यकर्ताहरूलाई सचेत गराएको हो ।

उपहासचिव हरिबोल गजुरेलले पार्टीका नेताहरूमा संगठनात्मक अराजकता र नेतृत्वका विरूद्ध जथाभावी अभिव्यक्ति दिने क्रम बढेपछि स्थायी समिति बैठकले यो निर्णय गरेको बताए ।

‘विधि, पद्धति र पार्टी अनुशासन विपरीत गएर नेतृत्वका विरूद्ध जथाभावी बोल्ने क्रम बढ्यो,’ गजुरेलले भने, ‘नेताहरूलाई त्यसरी नबोल्न सचेत गराउने निर्णय बैठकबाट भएको छ । जनार्दनजीलाई पनि सचेत गराइएको छ ।’

उपहासचिव जनार्दन शर्माले पार्टी अध्यक्ष पुष्पकमल दाहाल प्रचण्डका कारण पार्टीमा समस्या आएको बताउँदै आएका थिए । पार्टीका अरू नेताहरूले भने प्रचण्डमाथि प्रश्न गरेको भनेर शर्माको आलोचना गरिरहेका थिए ।

अधिकांश स्थायी कमिटी सदस्यहरूले शर्माले पार्टी विधि विपरीत बोलेको भन्दै उनले आत्मालोचना गर्नुपर्ने धारणा राखेका थिए ।

शर्माले भने आफूले गरेको कमजोरीको मात्रै जिम्मेवारी लिने भन्दै आत्मालोचना गर्न अस्वीकार गरेका थिए । त्यसपछि बैठकले अब आइन्दा पार्टीका विषयमा पार्टीभित्रै छलफल गर्नुपर्ने र बाहिर अभिव्यक्ति दिँदै हिँड्न नहुने निष्कर्ष निकालेको हो ।