गोल्यान ग्रुपको साढे ६ दशक : २५ बढी क्षेत्रमा लगानी, १० हजार बढीलाई रोजगारी

२१ साउन, काठमाडौं । नेपालको प्रमुख व्यावसायिक समूह गोल्यान ग्रुपले आफ्नो ६५ वर्ष पूरा गरेको अवसरमा नयाँ ब्रान्ड फिल्म सार्वजनिक गरेको छ । यस फिल्ममा कम्पनीको यात्रासँगै अगाडि बढेका नेपालीहरूको दैनिक जीवनका कथा उजागर गरिएको छ ।

‘गोल्यान फर ग्रोथ’ अर्थात् ‘विकासका लागि गोल्यान’ शीर्षक अन्तर्गत बनेको यो फिल्मले कृषि, उत्पादन, रियल इस्टेट, आतिथ्य सत्कार र नवीकरणीय ऊर्जाजस्ता क्षेत्रमा गोल्यान ग्रुपले गरेको लगानीले कसरी व्यक्ति, समुदाय र राष्ट्रका लागि वास्तविक अवसर सिर्जना गरेको छ भन्ने देखाएको ग्रुपले जनाएको छ ।

सन् १९६० मा स्थापित गोल्यान ग्रुप नेपालको एक प्रमुख व्यापारिक समूह हो, जसले देशभरि २५ भन्दा बढी व्यवसाय सञ्चालन गर्दै आएको छ ।

६ हजारभन्दा बढी कर्मचारी र ४० करोड अमेरिकी डलरभन्दा बढीको वार्षिक आम्दानीका साथ यस समूहको उत्पादन, कृषि, नवीकरणीय ऊर्जा, रियल इस्टेट र आतिथ्य सत्कार क्षेत्रमा बलियो उपस्थिति रहेको छ ।

गोल्यान ग्रुपले आफूहरूको जग नेपालभित्रै मूल्य सिर्जना गर्ने सिद्धान्तमा आधारित छ भन्दै रोजगारी सिर्जना गर्ने, पूर्वाधार निर्माण गर्ने र स्थानीय उत्पादन तथा निर्यात प्रोत्साहन गर्ने कुरा यसअन्तर्गत पर्ने उल्लेख गरेको छ ।

यो ब्रान्ड फिल्मले सोही प्रतिबद्धतालाई दृश्यात्मक रूपमा प्रस्तुत गरेको समूहको भनाइ छ ।

‘कम्पनीको दृष्टिकोणबाट नभई ती मानिसहरूको आँखाबाट जसको जीवनमा यसले सकारात्मक परिवर्तन ल्याएको छ,’ समूहको भनाइ छ, ‘सौर्य ऊर्जाबाट उज्यालो पाएको बच्चादेखि लिएर उचित बजारसम्म पहुँच पाएका किसान र आर्थिक रूपमा आत्मनिर्भर बनेका कारखानाका मजदुरसम्मको कथालाई यस फिल्मले समेटेको छ ।’

‘जब विकासले सबैलाई समेट्छ, तबमात्र त्यसको वास्तविक महत्त्व हुन्छ भन्ने कुरा यस ब्रान्ड फिल्मले देखाउँछ,’ गोल्यान ग्रुपका प्रबन्ध निर्देशक अक्षय गोल्यान भन्छन्, ‘यो फिल्म हामीबारे होइन । यो ती मानिसहरूबारे हो जसको जीवन र प्रयासले हाम्रो यात्रालाई आकार दिएको छ, जसरी हामीले उनीहरूको जीवनमा योगदान पुर्‍याएका छौं । यो साझा प्रगतिको कथा हो—ती मानिसहरू, समुदायहरू र हाम्रो देशको, जसको हामी गर्विलो हिस्सा हौं ।’

भिडियोमा रहेको सन्देशले गोल्यान ग्रुपको दीर्घकालीन दर्शन प्रतिविम्बित गर्छ । ६५ वर्षदेखि यस समूहले नाफाभन्दा माथि उठेर मानिसलाई सशक्त बनाउने, जीविकोपार्जनमा सुधार गर्ने र सबैका लागि दिगो भविष्य निर्माण गर्ने लक्ष्यसाथ आफूहरूले उद्यम खडा गर्दै आएको जनाएको छ, चाहे त्यो ऊर्जामा पहुँच विस्तार गरेर होस्, उचित बजार उपलब्ध गराएर होस्, रोजगारी सिर्जना गरेर होस् वा नेपालको अर्थतन्त्रलाई सुदृढ बनाएर होस् ।

गोल्यान ग्रुप साँचो अर्थमा महत्त्वपूर्ण हुने विकासप्रति प्रतिबद्ध छ भन्दै समूहले ‘विकासका लागि गोल्यान’ हो भनेको छ ।

गोल्यान ग्रुप र यसको नेतृत्वले धेरै सम्मान र पुरस्कार प्राप्त गरेका छन्, जसमा निर्यात र रोजगारीमा उत्कृष्ट योगदानका लागि सरकारद्वारा २०२५ र २०२० मा ‘व्यापारिक रूपमा महत्त्वपूर्ण व्यक्ति’ (सीआईपी) को उपाधि पनि समावेश छ ।

यस समूहले उत्कृष्ट निर्यातक र रोजगारदाता पुरस्कार ९२०२५०, सर्वोच्च निर्यातक पुरस्कार (२०२४) र औद्योगिक सम्बन्धमा उत्कृष्टता पुरस्कार (२०२२) लगायत अन्य धेरै सम्मान पनि प्राप्त गरेको छ ।

यी सबै सम्मानले जिम्मेवार र समावेशी विकासका माध्यमबाट आर्थिक प्रगतिमा गोल्यान ग्रुपको निरन्तर भूमिका दर्शाउँछ ।