सप्तरीका पत्रकार यादवमाथि छुरा प्रहार, एकजना पक्राउ

News Summary

Generated by OK AI. Editorially reviewed.

सप्तरीका पत्रकार सौरभ यादवमाथि राजविराजस्थित गजेन्द्रनारायण सिंह अस्पताल अगाडि छुरा प्रहार भएको छ।
यादवमाथि छिन्नमस्ता गाउँपालिका-१ का कृष्णनाथ यादव, राजविराज-११ का राजु यादव र विष्णुपुर गाउँपालिका-७ का राजबाबु झाले आक्रमण गरेको यादवले बताए।
प्रहरीले घटनामा संलग्न एकजनालाई पक्राउ गरिसकेको र अन्य दुईजनाको खोजी कार्य जारी रहेको छ।

३० साउन, जनकपुरधाम । सप्तरीका पत्रकार सौरभ यादवमाथि छुरा प्रहार भएको छ । यादवमाथि शुक्रबार बिहान १०:४२ बजेतिर राजविराजस्थित गजेन्द्रनारायण सिंह अस्पतालको दक्षिणी गेटअगाडि बसेर अन्य पत्रकार साथीसित कुरा गरिरहेको बेला छुरा प्रहार भएको हो ।

मोटरसाइकलमा आएका तीनजनाको समूहले आफूमाथि चक्कु, बेल्ट, हेलमेटले प्रहार गरेका बताउँदै यादवले किटानी जाहेरी दिएका छन् ।

आफूमाथि छिन्नमस्ता गाउँपालिका-१, वीरपुरका कृष्णनाथ यादव, राजविराज-११ राजु यादव र विष्णुपुर गाउँपालिका-७ का राजबाबु झाले आक्रमण गरेको यादवले बताए ।

दायाँ हातमा छुरा र शरीरमा चोट लागेर नयाँ पत्रिका दैनिकका सप्तरी संवाददाता रहेका यादव घाइते छन् । घाइते यादवको गजेन्द्रनारायण सिंह अस्पतालमा उपचार भइरहेको छ ।

सप्तरीका प्रहरी उपरीक्षक (एसपी) गौतम कुमार केसीले घटनामा संलग्न एकजनालाई पक्राउ गरिसकेको बताए । अन्य दुईजनाको खोजी कार्य जारी रहेको र घटना विषयमा थप अनुसन्धान गरिरहेको उनको भनाइ छ ।

पत्रकार महासंघ सप्तरी शाखा र मधेस प्रदेश समितिले विज्ञप्ति निकालेर घटनाको भर्त्सना गर्दै अविलम्ब दोषीहरूलाई पक्राउ गरी कानुनी दायरामा ल्याउन माग गरेको छ ।