‘एक चिहान’ नाटक भदौ २२ गतेदेखि प्रज्ञा भवनमा

News Summary

Generated by OK AI. Editorially reviewed.

हृदयचन्द्रसिंह प्रधानको उपन्यास 'एक चिहान'मा आधारित शैक्षिक नाटक भदौ २२ गतेदेखि प्रज्ञा प्रतिष्ठान कमलादीमा मञ्चन हुने भएको छ।
नाटक निर्देशक नकुल पौड्यालले यसलाई शैक्षिक दृष्टिले प्रस्तुत गरिएको र विद्यार्थीले उपन्यास प्रत्यक्ष अनुभूत गर्ने अवसर पाउने बताए।
नाटकले समाजका विडम्बना, पीडा र मानव मूल्यको प्रश्न उठाएको छ र यसअघि ५४ शो सफलतापूर्वक सम्पन्न भइसकेको छ।

काठमाडौं । हृदयचन्द्रसिंह प्रधानको चर्चित उपन्यास ’एक चिहान’ माथि आधारित शैक्षिक नाटक राजधानीमा मञ्चन हुने भएको छ ।

नाट्यशालाको प्रस्तुति तथा निर्देशक नकुल पौड्यालको निर्देशनमा तयार गरिएको नाटक भदौ २२ गतेदेखि प्रज्ञा प्रतिष्ठान कमलादीमा नियमित रूपमा देखाइनेछ ।

यसअघि बुटवल, चितवन र हेटौंडालगायतका स्थानमा ५४ शो सफलतापूर्वक सम्पन्न गरिसकेको नाटकले विद्यार्थी, शिक्षक, साहित्यप्रेमी र नाट्यकर्मीको प्रशंसा पाएको छ ।

समाजका विडम्बना, पीडा र मानव मूल्यको प्रश्नलाई उठान गर्ने यस नाटकलाई काठमाडौंमा पनि विशेष चासोका साथ प्रतीक्षा गरिएको आयोजकले बताएका छन् ।

निर्देशक पौड्यालका अनुसार नाटकलाई शैक्षिक दृष्टिले प्रस्तुत गरिएको छ । ‘साहित्यलाई मञ्चमार्फत जीवन्त बनाउन हाम्रो प्रयास हो । यस नाटकमार्फत विद्यार्थीले उपन्यासलाई प्रत्यक्ष अनुभूत गर्ने अवसर पाउनेछन्’ उनले बताए ।

नाटकमा प्रकाश र ध्वनि डिजाइन, पात्रको मनोविज्ञान र सामाजिक यथार्थलाई विशेष रुपमा देखाइएको छ । आयोजक नाट्यशालाले राजधानीका दर्शकलाई नाटक अवलोकन गर्न निम्तो दिँदै विद्यालय–विश्वविद्यालयका विद्यार्थीलाई विशेष प्राथमिकता दिने तयारी गरेको छ ।