२०८२ भदौ १३ गते १४:२७ 
News Summary
Generated by OK AI. Editorially reviewed.- नेपाल ए ले गुवाहाटीमा जारी टी-२० सिरिजको दोस्रो खेलमा आसामलाई ९६ रनले पराजित गरेको छ।
- युवराज खत्रीले ३.२ ओभरमा ४ विकेट लिए भने बसिर अहमदले ३ विकेट लिए।
- नेपाल ए ले आसामसँग कुल ५ खेल खेल्नेछ र बाँकी ३ खेलहरू एसीए रंगशालामा फ्लडलाइटमा हुनेछन्।
१३ भदौ, काठमाडौं । स्पीनरद्वय युवराज खत्री र बसिर अहमदको घातक बलिङ मद्दतमा भारतको गुवाहाटीमा जारी टी-२० सिरिजको दोस्रो खेलमा नेपाल ए ले आसाममाथि फराकिलो अन्तरको जित निकालेको छ ।
नेपालले आसामलाई ९६ रनले पराजित गरेको हो । नेपालले दिएको १७४ रनको लक्ष्य पछ्याएको आसाम १५.२ ओभरमा ७७ रनमा अलआउट भयो ।
आसामका रुहिनन्दन पेगुले सर्वाधिक १७ रन बनाए। सिबशंकर रोयले १६ रन बनाए ।
नेपालका लागि लेगब्रेक बलर युवराज खत्रीले ३.२ ओभरमा १५ रन दिएर ४ विकेट लिए । बाँयाहाते स्पीनर बसिर अहमदले ३ विकेट लिए । कमलसिंह ऐरी, आकाश चन्द र विवेक यादवले १-१ विकेट लिए ।
त्यसअघि टस जितेर पहिले ब्याटिङ गरेको नेपाल ए ले २० ओभरमा ७ विकेट गुमाएर १७३ रन बनाउँदै आसामलाई १७४ रनको लक्ष्य प्रस्तुत गरेको थियो ।
नेपाल ए का लागि सन्दीप जोराले सर्वाधिक ३५ रन बनाए । देव खनाल र पवन सर्राफले समान ३१ रन बनाए । बसिर अहमदले २७ रन तथा विवेक यादव २६ रनमा अविजित रहे ।
आसामका आकाश सेनगुप्ताले ४ ओभरमा २५ रन दिएर ३ विकेट लिए । अभिनव चौधरीले २ तथा आयुष्मान मलाकार र अभिलाष गोगोइले १-१ विकेट लिए ।
यसअघि बिहीबार भएको पहिलो खेलमा नेपाल ‘ए’ डीएल पद्धति अनुसार १५ रनले पराजित भएको थियो ।
नेपाल ए ले आसामसँग कुल ५ खेल खेल्नेछ । यसपछिका ३ खेलहरू एसीए रंगशालामा डे/नाइट रूपमा फ्लडलाइटमा खेलिनेछ ।
प्रतिक्रिया 4