सोबितालाई कांग्रेस सांसद थिङको चुनौती- संविधानको ज्ञान कोसँग रहेछ, जोखौं

१३ भदौ, काठमाडौं । सत्तारुढ दल नेपाली कांग्रेसकी सांसद सुशिला थिङले राष्ट्रिय स्वतन्त्र पार्टीकी सांसद सोबिता गौतमलाई संविधानबारे संसदमा बहस गर्न चुनौती दिएकी छिन् ।

प्रतिनिधि सभाको शुक्रवारको बैठकमा बोल्दै सांसद थिङले यस्तो चुनौती दिएकी हुन् ।

सांसद गौतमले केही दिनअघि चितवनमा आयोजित एक कार्यक्रममा बोल्दै संविधानबारे ज्ञान नभएकाहरू आफूलाई विधायिका भनेर घमण्ड गर्ने गरेको टिप्पणी गरेकी थिइन् ।

‘एकजना सम्मानित सांसद ज्यूले तिज विशेष कार्यक्रममा चितवनमा बोलेको भनाइप्रति खण्डन गर्न चाहन्छु । उहाँ कानुनको विद्यार्थी पनि हुनुहुन्छ,’ थिङले भनिन्, ‘उहाँले संसद्का ठूला नेताहरू, सांसदहरू संविधान र कानुनको ज्ञान भएका व्यक्ति छैनन् । रवि लामिछानेलाई कानुनको दुरुपयोग गरेर थुनेर राख्नुभएको छ, सदनमा बसेका सांसदहरूको संविधानसम्बन्धी ज्ञान नभएका व्यक्तिहरू विधायिका हुँ भनेर बसिरहेका छन् भनेर अभिव्यक्ति दिनुभयो । म यसको घोर भर्त्सना गर्न चाहन्छु ।’

सांसद थिङले संसदलाई बहिस्कार गरेर जाने नभई संसदभित्रै आवश्यक छलफल र बहस गरेर कसको ज्ञान कति भन्ने छिनोफानो गर्नुपर्ने टिप्पणी गरिन् ।

संसदबाहिर गएर सांसदहरुको अपमान गरेर बोल्ने अधिकार कसले दियो ? भन्दै सांसद गौतमलाई प्रश्न समेत गरिन् ।

‘उहाँलाई संविधानको ज्ञान रहेछ । यस संविधानमा संसद बहिस्कार गरेर बाहिर जाने होइन । यँही बहस गरौं, छलफल गरौं । कसलाई संविधानसम्बन्धी कति ज्ञान रहेछ नापौं, जोखौं, छिनोफानो गरौँ,’ उनले भनिन्, ‘सदनबाहिर गएर फ्याउरो जसरी कराएर सदनमा सांसदहरूको अपमान हुनेगरी बोल्ने अधिकार उहाँ (सोबिता गौतम) लाई कसले दियो ? म उहाँलाई प्रश्न गर्न चाहन्छु ।’

आफूहरू बैठक बहिस्कार गर्दै भत्ता बुझिरहेकाहरुले अरुलाई नैतिकताको पाठ सिकाउने कार्य सही नभएको तर्क पनि गरिन् ।