उपेन्द्र र प्रभुमाथि बदला सुरु भइसक्यो, अब प्रचण्डमाथि हुन्छ : माधव नेपाल

१३ भदौ, काठमाडौं । नेकपा (एकीकृत समाजवादी)का अध्यक्ष माधवकुमार नेपालले सरकारले बदला लिने काम सुरु गरेको बताउँदै कोही बँच्नेवाला नभएको जिकिर गरेका छन् ।

शुक्रवार पार्टीको ७ नम्बर क्षेत्रीय कमिटी, काठमाडौंले आयोजना गरेको अन्तरक्रिया कार्यक्रममा बोल्दै अध्यक्ष नेपालले यस्तो बताएका हुन् ।

उनले जनता समाजवादी पार्टी, नेपालका अध्यक्ष उपेन्द्र यादव, आम जनता पार्टी (आजपा) का अध्यक्ष प्रभु शाह लगायतमाथि बदला सुरु भइसकेको बताए ।

अब यो क्रम माओवादी केन्द्रका अध्यक्ष पुष्पकमल दाहाल प्रचण्डमाथि सुरु हुने पनि उनले बताए ।

‘अब बदला शुरु भएको छ उपेन्द्र यादव, प्रभु शाहमाथि । अब बदला सुरु हुनेछ प्रचण्डमाथि । कोही बाँकी बच्नेवाला छैनन्,’ उनले भने ।

प्रधानमन्त्री समेत रहेका नेकपा एमाले अध्यक्ष केपी शर्मा ओलीलाई लक्षित गर्दै कम्युनिष्ट आन्दोलनमा अधिनायकवाद मौलाएको टिप्पणी पनि गरे ।

एमालेतर्फ लक्षित गर्दै उनले त्यहाँ बसिरहेका मान्छे गहभरी आँसु बोकेर कहाँ झार्ने भन्ने ठाउँ खोज्दै हिँडिरहेको टिप्पणी गरे ।

एमालेभित्र रहेका मानिसहरुले भोगिरहेको र आफूहरु समेत तमासा हेरेर बसिरहेको उनको टिप्पणी छ ।

‘कम्युनिष्ट आन्दोलनमा अहिले देखा परेको अत्यन्तै खतरनाक अधिनायकवादी प्रवृत्तिले कस्तो कस्तो समस्या खडा गरेको छ । यो विषयमा धेरै बताइरहनु पर्दैन । जम्मै प्रमाण साक्षी छ भने तथ्य नै प्रष्ट छ,’ उनले भने, ‘त्यहाँ बसिरहेका मान्छे गहभरी आँसु बोकेर कहाँ आँशु झारौँ भनेर ठाउँ खोज्दै हिँडिरहेका छन् । दिनदिनै त्यहाँ भएका मान्छेहरूले भोगिरहेका छन् भने हामी पनि टाढा बसेर तमासा हेरेर बसिरहेका छौं ।’

आफूहरूले सुरु गरेको कम्युनिष्ट पार्टीले २०७४ सालमा बहुमत ल्याउँदा समेत संविधान संशोधन र ऐन कानून निर्माणमा तिव्रता दिन नसक्नुको मुख्य दोषी ओली रहेको उनले बताए ।

कम्युनिष्ट पार्टीका कार्यकर्ताको पहिलो काम समाज बदल्ने रहेको उल्लेख गर्दै त्यसका लागि अग्रसर हुन पार्टी कार्यकर्तालाई आग्रह पनि उनले गरे ।