२०८२ भदौ १५ गते ८:०२ 
News Summary
Generated by OK AI. Editorially reviewed.- म्यान्चेस्टर युनाइटेडले इंग्लिस प्रिमियर लिगमा बर्नलीलाई ३–२ ले पराजित गरेको छ।
- कप्तान ब्रुनो फर्नान्डेसले इन्जुरी समयमा पेनाल्टी गोल गर्दै युनाइटेडको जित सुनिश्चित गरे।
- यो जितपछि युनाइटेडले लिगमा ४ अंक जोडेर नवौं स्थानमा पुगेको छ।
१५ भदौ, काठमाडौं । खेल सकिनै लाग्दा पाएको पेनाल्टीमा निर्णायक गोल गरेपछि इंग्लिस प्रिमियर लिगमा म्यान्चेस्टर युनाइटेडले बर्नलीलाई ३–२ ले पराजित गरेको छ।
युनाइटेडको जितमा कप्तान ब्रुनो फर्नान्डेस निर्णायक बने। यसअघिको खेलमा पेनाल्टी मिस गरेका उनले यसपटक भने पेनाल्टीमार्फत गोल गर्दै टोलीलाई रोमाञ्चक जित दिलाए।
खेलको निर्णायक क्षण भने निकै नाटकीय रह्यो। इन्जुरी समय सकिनै लाग्दा ९०+८औं मिनेटमा अमाड डियालोमाथि भएको फाउलपछि भीएआर समीक्षा हुँदै पेनाल्टी दिइएको थियो।
त्यसलाई फर्नान्डेसले सहजै गोलमा परिणत गर्दै घरेलु मैदान ओल्ड ट्राफोर्डमा युनाइटेडको जित सुनिश्चित गरे।
त्यसअघि युनाइटेडले खेलको सुरुवाती अग्रता २७औं मिनेटमा पाएको थियो, जब कासेमिरोको हेडर पोस्टबाट फर्किएर बर्नलीका जोश कुलिनमाथि लागेर आत्मघाती गोल भएको थियो।
दोस्रो हाफको ५५औं मिनेटमा बर्नलीका लाइल फोस्टरले गोल गर्दै खेल बराबरीमा ल्याए । त्यसको २ मिनेटमै युनाइटेडका ब्रायन एम्बेउमोले गोल गर्दै युनाइटेडलाई २–१ को अग्रता दिलाए।
जाइडन एन्टोनीले क्रमश ६६औं मिनेटमा गोल गर्दै खेललाई फेरि बराबरीमा ल्याए। तर अन्तिम क्षणमा आएको पेनाल्टी गोलले युनाइटेडलाई तीन अंक दिलायो।
यो जितसँगै युनाइटेडले लिगमा निराशाजनक प्रदर्शनपछि केही राहत पाएको छ भने प्रशिक्षक रुबेन आमोरिममाथिको दबाब पनि अस्थायी रूपमा कम भएको छ।
३ खेलमा ४ अंक जोडेको युनाइटेड नवौं स्थानमा छ ।
प्रतिक्रिया 4