२०८२ भदौ २८ गते ८:०३ 
News Summary
Generated by OK AI. Editorially reviewed.- फिलिप साल्टले विस्फोटक शतक बनाएपछि इंग्ल्याण्डले दक्षिण अफ्रिकाविरुद्ध दोस्रो टी-२०आईमा ३०४ रनको कीर्तिमानी योगफल बनाएको छ।
- इंग्ल्याण्डको यो स्कोर टी-२०आई इतिहासकै सबैभन्दा ठूलो हो र दुई टेस्ट राष्ट्रबीचको टी-२०आई खेलमा सबैभन्दा उच्च योगफल हो।
- दक्षिण अफ्रिका १६.१ ओभरमा १५८ रनमै अलआउट भएपछि इंग्ल्याण्डले १४६ रनको विशाल जित दर्ता गरेको छ।
२७ भदौ, काठमाडौं । फिलिप साल्टले विस्फोटक शतकसहित १४१ रन बनाएपछि इंग्ल्याण्डले दक्षिण अफ्रिकाविरुद्धको दोस्रो टी-२०आईमा कीर्तिमानी योगफल बनाएको छ ।
इंग्ल्याण्डले २० ओभरमा २ विकेट गुमाएर ३०४ रनको विशाल योगफल बनाएको हो । यो इंग्ल्याण्डको टी-२०आई इतिहासकै सबैभन्दा ठूलो स्कोर हो भने दुई टेस्ट राष्ट्रबीचको टी-२०आई खेलमा यो सबैभन्दा उच्च योगफल हो । समग्रमा तेस्रो सर्वाधिक योगफल हो ।
टी-२०आईमा सर्वाधिक योगफल जिम्बाबेको नाममा छ । गाम्बियाविरुद्ध जिम्बाबेले ३४४ रन बनाएको थियो । दोस्रो सर्वाधिक योगफल भने नेपालको नाममा छ । नेपालले मंगोलियाविरुद्ध ३१४ रन बनाएको थियो ।
साल्टले विस्फोटक ब्याटिङ गर्दै ६० बलमा अविजित १४१ रन बनाए, जुन इंग्ल्याण्ड खेलाडीको टी-२०आईमा उच्चतम व्यक्तिगत स्कोर हो । यसले उनको अघिल्लो उच्च स्कोर (वेस्ट इन्डिजविरुद्ध सन् २०२३ मा बनाएको ११९ रन) लाई समेत तोड्यो । साल्टको शतक टी-२०आई इतिहासकै सातौं उच्चतम व्यक्तिगत स्कोर पनि हो ।
इंग्ल्याण्डका ब्याटरले २२८ रन केवल चौका–छक्का मार्फत बनाए, जुन इतिहासमै तेस्रो सर्वाधिक हो । त्यसैगरी इंग्ल्याण्डमा खेलिएको कुनै पनि टी-२० खेलको यो उच्चतम योगफल बनेको छ ।
जवाफी ब्याटिङमा ३०५ रनको लक्ष्य पछ्याएको दक्षिण अफ्रिका १६.१ ओभरमा १५८ रनमै अलआउट भयो र इंग्ल्याण्डले १४६ रनको विशाल जित दर्ता गर्यो ।
प्रतिक्रिया 4