पेरिसडाँडामा सुरु भयो माओवादी पदाधिकारी बैठक

News Summary

Generated by OK AI. Editorially reviewed.

नेकपा माओवादी केन्द्रको पदाधिकारी बैठक ५ असोज, काठमाडौंमा पार्टी केन्द्रिय कार्यालय पेरिसडाँडामा सुरु भएको छ।
बैठकमा जेनजी आन्दोलनपछि विकसित परिस्थितिबारे छलफल हुने माओवादी अध्यक्ष पुष्प कमल दाहाल प्रचण्डको सचिवालयले जानकारी दिएको छ।
जेनजी प्रदर्शनका क्रममा पार्टी कार्यालय र नेताहरूको घरमा आगजनी र तोडफोड भएको थियो, माओवादीले सरसफाइ गरेर कार्यालय पुनः सञ्चालनमा ल्याएको छ।

५ असोज, काठमाडौं । नेकपा माओवादी केन्द्रको पदाधिकारी बैठक केहिबेर अघि सुरु भएको छ । जेनजी आन्दोलनपछि विकसित परिस्थितिबारे छलफल गर्न माओवादीले पदाधिकारी बैठक बोलाएको हो ।

पार्टी केन्द्रिय कार्यालय पेरिसडाँडामा सुरु भएको बैठकमा समसामयिक विषयमा छलफल हुने माओवादी अध्यक्ष पुष्प कमल दाहाल प्रचण्डको सचिवालयले जानकारी दिएको छ । बैठक एजेन्डाबारे थप खुलाइएको छैन ।

जेनजी आन्दोलनपछि माओवादीभित्र पनि पुन: नेतृत्व रुपान्तरणको बहस चर्किन थालेको छ । पार्टी उपमहासचिव जनार्दन शर्माले सार्वजनिक रूपमै अध्यक्ष प्रचण्डको राजीनामा मागिसकेका छन् ।

तर, संस्थापन पक्षका नेताहरूले भने अझै पनि नेतृत्वमा प्रचण्डको विकल्प खोज्ने बेला नभएको तर्क छाडेका छैनन् ।

भदौ २३ र २४ गते भएको जेनजी प्रदर्शनका क्रममा प्रदर्शनकारीले माओवादीको पार्टी कार्यालयमा समेत आगजनी र तोडफोड गरेका थिए ।

सरसफाइ गरेर माओवादीले पार्टी कार्यालय पुन: सञ्चालनमा ल्याएको छ । जेनजी प्रदर्शनका दिन अध्यक्ष प्रचण्डको निवाससहित अन्य अन्य नेतहरूको घरमा समेत तोडफोड र आगजनी भएको थियो ।