मन्त्रिपरिषद्‌मा जेनजी वा शहीद परिवारको सहभागिता अनिवार्य गरियोस् : प्रभु साह

News Summary

Generated by OK AI. Editorially reviewed.

आम जनता पार्टीका अध्यक्ष प्रभु साहले सुशीला कार्की नेतृत्वको सरकारमा जेनजी वा जेनजी शहीद परिवारको अनिवार्य सहभागिता हुनुपर्ने बताएका छन्।
साहले अन्तरिम सरकार गठनले मात्र जेनजी आन्दोलनको माग सम्बोधन नहुने भएकाले अन्तरिम संविधान आवश्यक भएको बताएका छन्।
उनले अहिलेकै संविधानबाट जेनजी आन्दोलनको माग सम्बोधन गर्न नसकिने र अन्तरिम संविधान आवश्यक रहेको बताएका छन्।

१६ असोज, काठमाडौं । आम जनता पार्टी (आजपा)का अध्यक्ष प्रभु साहले सुशीला कार्की नेतृत्वको सरकारमा जेनजी वा जेनजी शहीद परिवारको तर्फबाट अनिवार्य सहभागिता हुनुपर्ने बताएका छन् ।

‘जुन वर्गको आन्दोलनले यस्तो परिवर्तन भयो त्यही बर्गको सरकारमा सहभागिता नहुनु दु:खद छ’ उनी भन्छन्, ‘यो सरकारमा जेनजी वा जेनजी शहीद परिवारको तर्फबाट अनिवार्य सहभागिताको आवश्यकता छ ।’

दशैं, दिपावली, छठ पर्वको अवसरमा रौतहटको मर्यादपुरमा बिहीबार आयोजित कार्यक्रमलाई सम्बोधन गर्दै आजपा अध्यक्ष साहले यस्तो बताएका हुन् ।

अन्तरिम सरकारको गठनले मात्रै जेनजी आन्दोलनको माग सम्बोधन गर्न नसकिने भएकाले त्यसका लागि अन्तरिम संविधान आवश्यक भएको उनको आग्रह छ ।

‘अहिलेकै संविधानबाट जेनजी आन्दोलनको माग सम्बोधन गर्न सकिँदैन । जेनजी आन्दोलनको माग सम्बोधन र मुलुकमा देखिएको अहिलेको संकट समाधानका लागि अन्तरिम संविधान आवश्यक छ,’ आजपा अध्यक्ष साहले भने ।

अन्तरिम सरकार गठन गरेर जेनजीको माग टालटुल गर्न नहुने उनको आग्रह छ ।