समाजवादीका नेताहरू छहारी खोज्दै झोलीतुम्बा बोकेर कुद्दै छन् : ओली

विभिन्न कालखण्डमा कतिपय कारणले कतिपय साथीहरूले गल्ती गर्नु भएको छ । तर अब तिनै गल्तीमा अल्झिएर बस्ने बेला होइन ।

कतिले पार्टीले विभाजन गरे गराए । संगतले होला सम्पर्कले होला । अरु कारणले होला, साथीहरू भ्रममा पर्नु होला । भूलवस अनेक संगत परिस्थितिले पार्टी परित्याग गरेर पनिजानुभयो होला, विभाजनमा पनि अर्कोतिर कुद्नु भयो होला ।

तर नेकपा एमाले एउटा फराकिलो छाती भएको विशाल अभिभारा काँधमा बोकेर हिँडेको पार्टी हो यसको मनमा, यसको हृदयमा संकिर्णता छैन । त्यसकारण म साथीहरुलाई आग्रह गर्न चाहन्छु, हिजो जो घर छोडेर अन्यत्र जानु भएको थियो घर फर्किनका लागि म आग्रह गर्न चाहन्छु ।

हिजो उहाँहरुसँगै भएर पनि हामीले यो पार्टी निर्माण गरेको हो । उहाँहरुको पनि यो पार्टी निर्माण गर्नमा योगदान छ, विभिन्न कारणले जानुभो होला कुनै समय कतै, त्यसैमा नअल्झिनु ।

आज समाजवादी पार्टीका नेताहरु छहारी खोज्दै कसका पिँढीमा बास बसँु भनेर झोलीतुम्बा बोकेर कुद्दै छन्, म कार्यकर्ता साथीहरुलाई भन्न चाहन्छु, तपाईं आफैंले बनाएको पार्टी यहाँ छ, आश्रय खोज्न नजानुस् कुनै चौपारी खोज्न नजानुस् । कसैका बलेसीबाट भित्र छिरेर ओत लाग्ने कुरा नखोज्नुस् । यो मजबुत घर छ, यसलाई कसैले डग्मगाउन सक्दैन यो मजबुत पार्टी हो ।