जेनजी आन्दोलनका उपलब्धिलाई संस्थागत गरेर अघि बढ्नुपर्छ : स्वर्णिम वाग्ले

१४ कात्तिक, काठमाडौं । राष्ट्रिय स्वतन्त्र पार्टी (रास्वपा) का उपसभापति डा. स्वर्णिम वाग्लेले जेनजी आन्दोलनका उपलब्धिलाई संस्थागत गर्दै अघि बढ्नुपर्ने बताएका छन् ।

शुक्रबार पार्टीले आयोजना गरेको कार्यक्रममा बोल्दै उनले जेनजी आन्दोलनले सबै राजनीतिक दलहरूमा रुपान्तरणको चाप बढाएको बताउँदै त्यसलाईं संस्थागत गर्दै अघि बढ्नुको विकल्प नरहेको बताए ।

मुलुकमा भएका परिवर्तनलाई वैधता दिन पनि निर्वाचनमा जानुको विकल्प नरहेको उनको भनाइ छ ।

विगतमा भएको आन्दोलनको उपलब्धिलाई जोगाउँदै नयाँ उपलब्धिलाई संस्थागत गर्न र मुलुकलाई सुशासनको पक्षमा लैजान पनि निर्वाचनमा जानुपर्ने उनले बताए ।

‘डा. बाबुराम भट्टराईले पनि एउटा उदाहरण प्रस्तुत गर्ने भएको छ । दल छोडेर उहाँले एउटा स्वतन्त्र र पूर्वप्रधानमन्त्रीको हैसियतमा अहिले हुनुहुन्छ । अन्य दलमा पनि यसले जुन रुपान्तरणको चाप बढाएको छ । दबाब बढाएको छ । त्यसलाई विस्तारै संग्रह गरेर सुशासन पक्षमा हामीले यसलाई वैधता दिनेतिर जानुनै पर्ने हुन्छ,’ वाग्लेले भने ।

उनले अगाडि भने, ‘पछिल्लो आन्दोलनको उपलब्धिलाई संस्थागत गर्दै अघि बढ्नुपर्ने छ । अग्रगमनको बाटोमा जानुपर्नेछ । पहिलेका आन्दोलनबाट प्राप्त दुर्लभ उपलब्धिहरूलाई पनि जोगाउनु छ । कहिलेकहीँ यो हुल आँधिबेहरीमा पुराना उपलब्धिलाई बढार्ने काम हुन्छ । पश्चागमनका प्रयासहरू पनि हुने गर्दछन् । त्यसैले अगाडि नै जाने हो ।’

विधि, विधान, संविधानलाई धेरै मिच्न नहुने भन्दै उनले त्यो मिचिएको खण्डमा पनि डिरेल भएका कुरालाई पनि ट्रयाकमा ल्याउनु पर्ने उनले बताए । तर ट्रयाकमा ल्याउने विधिहरू पनि सीमित रहेको उनले बताए ।