माओवादी छाडेर जनार्दनले घोषणा गरे– प्रगतिशील अभियान नेपाल

Photo Credit : विकास श्रेष्ठ/अनलाइनखबर

News Summary

Generated by OK AI. Editorially reviewed.

माओवादी केन्द्रका पूर्वउपमहासचिव जनार्दन शर्माले प्रगतिशील अभियान, नेपाल नामक नयाँ राजनीतिक अभियान घोषणा गरेका छन्।
शर्माले पार्टीको नेतृत्वसँग लामो समयदेखि संघर्ष गर्दै दश वर्षे संघर्ष र पछिल्लो जेनजी आन्दोलनका माग विपरीत नेतृत्व अघि बढेकाले एकता प्रक्रियाबाट बाहिरिएको बताए।
विगतका कमजोरी स्वीकार्दै उनले नयाँ अभियानका साथ विभाजित वाम र प्रगतिशील शक्तिहरूलाई एकीकृत समाजवादी आन्दोलनतर्फ अघि बढाउने उल्लेख गरे।

१८ कात्तिक, काठमाडौं। नेकपा एकीकृत समाजवादी लगायत आठ दलसँग एकताको निर्णयमा पुगेको नेकपा माओवादी केन्द्र विभाजित भएको छ।

पार्टीका पूर्वउपमहासचिव जनार्दन शर्मा, पूर्वसचिव राम कार्की, पूर्वस्थायी समिति सदस्य अञ्जना विशुंखे लगायतले पार्टी परित्याग गर्दै नयाँ अभियान सुरु गरेका छन्।

मंगलबार पत्रकार सम्मेलन आयोजना गर्दै शर्माले प्रगतिशील अभियान, नेपाल नामको राजनीतिक अभियान घोषणा गरे।

पार्टीको मूल नेतृत्वसँग लामो समयदेखि संघर्ष गर्दै आएका शर्माले माओवादीको नेतृत्वमा भएको दशवर्षे संघर्षदेखि पछिल्लो जेनजी आन्दोलनले उठाएका माग र भावना विपरीत पार्टी र नेतृत्व अघि बढेकाले एकता प्रक्रियाबाट बाहिरिएको बताए।

यो पनि पढ्नुहोस

अक्षम नेतृत्वलाई विस्थापित गर्न नसक्दा कम्युनिष्ट आन्दोलन विघटित भयो: राम कार्की

उनले विगतको नेतृत्वका खराब आचरण र क्रियाकलापमा आफूहरूले पनि सघाएको आत्मालोचना गर्दै अब सच्चिएर अघि बढ्न अभियान थालेको दाबी गरे।

‘विगतका हाम्रा कमजोरीलाई स्वीकार गर्दै नयाँ अभियानका साथ हामी अघि बढ्छौं’ पत्रकार सम्मेलनमा उनले भने, ‘विखण्डित वाम र प्रगतिशील शक्तिहरूलाई एकीकृत समाजवादी आन्दोलनको दिशामा अघि बढाउने वैचारिक र राजनीतिक प्रयास सुरु भएको छ।’